Qang‘qada V–VIII asrlarga oid ibodatxona topildi
Toshkent viloyati Oqqo‘rg‘on tumanida joylashgan Qang‘qa shaharchasida olib borilgan arxeologik tadqiqotlar davomida V–VIII asrlarga oid deb taxmin qilinayotgan ibodatxona majmuasi qoldiqlari va metall zirh qoldiqlari topildi. Bu haqda Zamin.uz xabar berdi.
Ushbu ma’lumotni O‘zbekiston Fanlar akademiyasi Tarix instituti taqdim etdi. Mazkur tadqiqotlar Qang‘qa shaharchasini “ochiq osmon ostidagi muzey” sifatida tashkil etish maqsadida davlat dasturi doirasida amalga oshirilmoqda.
500 gektar maydonni egallagan ushbu arxeologik yodgorlik qadimgi Qang‘ davlati va Toshkent vohasining ilk poytaxti hisoblanadi. Ba’zi tadqiqotchilar Qang‘qani “Avesto” matnlarida tilga olingan Qang‘diz va “Shohnoma” dostonidagi afsonaviy Qang‘diz bilan bog‘lashadi.
Topilmalar “Harbiy tarix markazi” va “Qadimgi dunyo tarixi” bo‘limi tomonidan shaharcha tsitadelining quyi madaniy qatlamlarida olib borilgan tadqiqotlar davomida aniqlangan. Dastlabki taxminlarga ko‘ra, topilgan zirh qoldiqlari diniy marosimlar uchun atalgan qurbonlik bo‘lishi mumkin.
Qadimda zargarlar tomonidan yaratilgan qimmatbaho buyumlar ibodatxonalarga hadya qilinishi odat bo‘lgan. Masalan, Boykent ibodatxonasida olib borilgan qazishmalarda ham shunga o‘xshash topilmalar aniqlangan.
Mutaxassislarning fikricha, bu kashfiyot Markaziy Osiyoda ilk o‘rta asrlarda yashagan turkiy xalqlarning harbiy madaniyati va diniy an’analarini o‘rganishda muhim ahamiyat kasb etadi. Qang‘qa shaharchasi avvalgi tadqiqotlar davomida ham qimmatli ma’lumotlar bergan.
Masalan, 2021-yilda ibodatxona majmuasining kirish qismida ot jabduqlariga oid buyumlar topilgan edi. Yangi kashfiyotlar ushbu hududda harbiy hunarmandchilikning yuqori darajada rivojlanganini va diniy marosimlarning murakkab ekanini yana bir bor tasdiqlaydi.
