Lazgi — xalqimizning erkinlik va quvonch ramzi
Lazgi — Xorazm zaminida shakllangan, bugungi kunda esa butun O‘zbekistonning madaniy merosiga aylangan milliy raqs sanaladi. Bu haqda Zamin.uz xabar berdi.
Bu raqs insonga quvonch, ruhiy yuksalish va erkinlik tuyg‘usini bag‘ishlaydi. Olimlarning fikriga ko‘ra, Lazgining ildizlari qadimiy davrlarga borib taqaladi va u Zarafshon hamda Amudaryo oralig‘idagi boy madaniyat bilan uzviy bog‘liqdir.
Rivoyatlarga ko‘ra, Lazgi dastlab tabiat bilan uyg‘un yashagan dehqon va chorvadorlarning quvonch harakatlaridan kelib chiqqan. Ular yomg‘ir yog‘ganda yoki hosil mo‘l bo‘lganda sevincdan qo‘l va yelka harakatlari orqali minnatdorlik izhor qilishgan.
Bu harakatlar vaqt o‘tishi bilan tartibli ritm va qadamlar tizimiga aylanib, Lazgi raqsining asosini tashkil etgan. Lazgi raqsining eng muhim xususiyatlaridan biri bu erkin harakat va ruhiy ozodlik ifodasidir.
Raqqos qo‘llarini qush qanotiday yoyib, yelka va bosh harakatlari orqali o‘z hissiyotlarini namoyon qiladi. Bu raqs faqat badanning harakati emas, balki qalbning ham ichki tuyg‘ularini aks ettiradi.
Xorazm Lazgisi o‘zining jo‘shqinligi, tez sur’atlari va jonli musiqasi bilan ajralib turadi. Uning jozibasi nafaqat o‘zbek xalqini, balki xalqaro miqyosdagi tomoshabinlarni ham hayratda qoldiradi.
2019 yilda YUNЕSKO tomonidan Lazgi insoniyatning nomoddiy madaniy merosi ro‘yxatiga rasman kiritildi. Bugungi kunda Lazgi nafaqat Xorazmning, balki butun O‘zbekistonning faxri hisoblanadi.
U milliy g‘urur, shodlik va erkinlik timsoli bo‘lib, xalqimizning boy madaniyati va an’analarini dunyoga tanitishda muhim o‘rin tutadi.
