“Billni o‘ldirish” kengaytirilgan versiyasi taqdim etildi

Lionsgate kompaniyasi Kventin Tarantinoning “Billni o‘ldirish: Butun qonli tarix” filmining kengaytirilgan rejissyorlik versiyasi uchun yangi treyler taqdim etdi. Bu haqda Zamin.uz xabar berdi.

Dastlab, “Billni o‘ldirish” bitta loyiha sifatida yaratilgan va to‘liq metrajli film shaklida suratga olingan. Biroq montaj jarayonida film ikki qismga bo‘lingan.

Ular 2003 yil oktyabr va 2004 yil aprel oylarida tomoshabinlarga taqdim etilgan. Kengaytirilgan versiyada birinchi qismning oxiri va ikkinchi qismning boshlanishi olib tashlanib, ilgari namoyish qilinmagan 7,5 daqiqalik animatsion ketma-ketlik qo‘shilgan.

Rejissyor Kventin Tarantino bu haqda shunday dedi: “Men filmni bitta loyiha sifatida yozganman va suratga olganman. Endi esa muxlislarga uni asl ko‘rinishda tomosha qilish imkoniyatini berayotganimdan juda xursandman.” Tarantino filmni katta ekranda, 70 yoki 35 millimetrli plyonka formatida tomosha qilishni eng yaxshi tajriba deb atadi.

U tomoshabinlarni katta ekranda filmning barcha detallaridan bahramand bo‘lishga chorlab, qiziqish uyg‘otdi. “Billni o‘ldirish: Butun qonli tarix” filmining premerasi AQShda 5 dekabr kuni o‘tkazilishi rejalashtirilgan.