“Janob hech kim” filmi qahramonlari: bugungi hayot
O‘zbek kinosida alohida o‘rin egallagan “Janob hech kim” filmi 2008-yilda rejissyor Mirmaqsud Oxunov tomonidan suratga olingan edi. Bu haqda Zamin.uz xabar berdi.
Komedik drama janrida ishlangan ushbu film o‘z davrida katta muvaffaqiyatga erishib, o‘zbek tomoshabinlari orasida mashhurlikka erishdi. Filmning yaratilganiga 17 yil o‘tgan bo‘lsa-da, undagi qahramonlar va aktyorlarning bugungi hayoti ko‘pchilikni qiziqtirmoqda.
Film syujetida bosh qahramon Alisherning yetimlikda ulg‘aygani va tog‘asining oilasida xizmatkor darajasiga tushib qolgani tasvirlanadi. U o‘z taqdirini o‘zgartiruvchi muhim uchrashuv orqali hayotini yangi yo‘nalishga buradi.
Bosh rol ijrochisi Alisher Uzoqov o‘sha davrda o‘zbek kinosining yetakchi aktyorlaridan biri edi. Keyingi yillarda u asosan prodyuserlik faoliyatiga o‘tdi.
Bir necha yillik tanaffusdan so‘ng, u televideniyega qaytib, Zo‘rTV kanalida “The Cover Up” loyihasini boshladi. Shuningdek, u “Kuzda gullagan daraxt”, “Hayotda” va “Muzlagan” filmlarida ham o‘zini turli obrazlarda ko‘rsatdi.
2025-yil sentyabr oyida esa “Oshiqman” nomli yangi qo‘shig‘i va klipini muxlislarga taqdim etdi. Filmda Oydin rolini ijro etgan Asal Shodiyeva o‘z davrining eng taniqli aktrisalaridan biri bo‘lib, 2013-yilda kinodan vaqtincha chekinishini e’lon qildi.
Biroq keyinchalik u yana ekranlarga qaytib, 2025-yilda “Uyga qaytish” filmida bosh rolni ijro etdi. Shuningdek, u qo‘shiqchilik faoliyatini ham davom ettirmoqda.
Alisherning tog‘asi Komilboy obrazini gavdalantirgan Hamid Toshpo‘latov bugungi kunda 68 yoshda. U 1969-yildan buyon sahnada va ekranlarda faol ijod qilib kelmoqda.
“O‘zbekistonda xizmat ko‘rsatgan artist” unvoniga ega bo‘lgan san’atkor hozirda O‘zbek milliy akademik drama teatri sahnasida ishlashda davom etmoqda. So‘nggi yillarda u “Ishq va anduh” filmida ham ishtirok etdi.
“Janob hech kim” filmi ijodkorlari bugungi kunda ham san’at sohasida faoliyat olib bormoqda va muxlislarini yangi ishlari bilan xursand qilishni davom ettirmoqda.
