Turk seriallari: madaniy ta’sir va iqtisodiy yutuqlar

Turk seriallari o‘zining hissiyotlarga boy syujetlari, kuchli obrazlari va oila, sevgi hamda hokimiyat mavzularini qamrab olgan hikoyalari bilan O‘zbekiston va MDH davlatlarida katta ommalashuvga erishdi. Bu haqda Zamin.uz xabar berdi.

2024-yilda Turkiya serial eksportidan 500 million dollar daromad ko‘rdi. Ushbu seriallar dunyoning 200 dan ortiq mamlakatida namoyish etilib, bir milliardga yaqin tomoshabin auditoriyasini qamrab oldi.

Turk seriallarining mashhurligi 1986-yilda suratga olingan “Kichkintoy qush” asaridan boshlangan bo‘lsa, bugungi kunda bu ommalashuv yanada ortib bormoqda. Turkiya hozirda dunyo bo‘ylab televizion kontent eksporti bo‘yicha yetakchi davlatlardan biri hisoblanadi.

Ushbu seriallar nafaqat madaniy, balki iqtisodiy jihatdan ham katta ta’sirga ega. Ayniqsa, “Muhtasham asr” seriali mashhurlik cho‘qqisiga chiqqan bo‘lib, unda Sultan Sulaymon I davridagi saroy hayoti, siyosiy qarorlar va murakkab munosabatlar hikoya qilinadi.

Sulton Sulaymon donishmand hukmdor sifatida tasvirlanadi, biroq uning insoniy zaifliklari ham ochib beriladi. Serialdagi Hürrem Sulton obraziga kuchli, maqsadli va ta’sirchan ayol sifatida alohida e’tibor qaratilgan.

“Kara Sevda” seriali xalqaro mukofotga sazovor bo‘lgan birinchi turk seriali hisoblanadi. Unda oddiy yigit Kemal va badavlat oilaning qizi Nihan o‘rtasidagi murakkab sevgi hikoyasi tasvirlangan.

“Ichkarida” seriali esa ikki aka-uka — Sarp va Mertning bolaligida ajralib, hayot yo‘llari turlicha rivojlanishi va oxir-oqibat bir-birlariga qarshi chiqishi haqida hikoya qiladi. Ushbu serialda kriminallik, detektivlik va oilaviy drama uyg‘unlashgan.

“Chuqur” seriali esa kriminallik va oilaviy voqealar asosida yaratilgan bo‘lib, unda Chuqur mahallasi va uni boshqaruvchi Ko‘chovali oilasi hikoyasi tasvirlanadi. “Qoplon vodiysi” seriali siyosiy triller va kriminallik janrida suratga olingan bo‘lib, unda milliy xavfsizlik operatsiyalari va Polat Alemdarning xarizmatik obraziga alohida urg‘u berilgan.

“1001 tun” seriali esa Shahrizoda va Onur o‘rtasidagi murakkab munosabatlar haqida hikoya qilib, insoniy hissiyotlar va axloqiy masalalarni o‘rtaga tashlaydi. “Fatmagulning aybi nima?” seriali jamiyatdagi muammolarni ochiq yoritgani uchun katta e’tibor qozongan.

“Feriha” seriali esa ijtimoiy tabaqalar o‘rtasidagi kurashni aks ettiradi. “Qahramon” seriali ikki oila o‘rtasidagi uzoq yillik adovat fonida rivojlangan sevgi hikoyasini o‘zida aks ettiradi.

Ushbu seriallar Markaziy Osiyo va MDH davlatlarida tomoshabinlar orasida katta shuhrat qozonib, madaniy aloqalarni mustahkamlashga xizmat qilmoqda.