Frida Kaloning asari 54,7 mln dollarga sotildi
Frida Kaloning 1940 yilda chizilgan "Tush (Karavot)" nomli avtoportreti Nyu-York shahrida o‘tkazilgan Sotheby’s kimoshdi savdosida 54,7 million dollarga sotildi. Bu haqda Zamin.uz xabar berdi.
Bu asar taniqli meksikalik rassomning eng qimmat baholangan ijod namunasi sifatida tarixga kirdi. Bu haqda Associated Press xabar berdi.
Mazkur rasm xususiy kolleksiyadan olingan bo‘lib, unda yog‘och karavotda yotgan Frida Kalo tasvirlangan. Suratda rassom bulutlar, lianalar va barglar bilan o‘ralgan holda chizilgan.
To‘shak ustida esa dinamit bilan o‘ralgan skelet shakli aks etgan. Ushbu asar orqali rassom o‘zining hayotidagi chuqur iz qoldirgan og‘ir avtohalokatni, cheksiz og‘riq va o‘lim bilan bog‘liq kechinmalarini ifodalagan.
Ma’lumki, Frida Kalo 18 yoshida og‘ir avtohalokatga uchragan va bu voqea uning sog‘lig‘iga jiddiy ta’sir ko‘rsatib, uzoq yillar to‘shakka mixlanib qolishiga sabab bo‘lgan. Rasmda uning shaxsiy hayoti va ichki dunyosi yorqin aks ettirilgan.
