“Titanik” kemasida halok bo‘lgan tadbirkor Isidor Shtrausga tegishli oltin cho‘ntak soati Angliyadagi Henry Aldridge and Son auksionida 2,33 million dollarga sotildi. Bu haqda Zamin.uz xabar berdi.
Bu haqda BBC xabar berdi. Isidor Shtraus “Macy’s” savdo tarmog‘i asoschilaridan biri bo‘lib, u rafiqasi Ida bilan birga “Titanik” kemasida safarga chiqqan edi.
Kema aysberg bilan to‘qnashgach, Shtraus qutqaruv qayig‘iga chiqishdan bosh tortib, kemani tark etmaslikka qaror qiladi. Uning rafiqasi Ida ham erining yonida qolishni tanlaydi.
Ularning o‘rniga oqsoch qutqaruv qayig‘iga chiqadi. Shtraus er-xotinining fojiali sadoqati 1997-yilda Jeyms Kemeron tomonidan suratga olingan “Titanik” filmida ham aks ettirilgan.
Filmda ular kema cho‘kayotgan paytda bir-biriga sadoqat bilan quchoqlashib yotgan holatda tasvirlanadi. Auksion uyining ma’lumotiga ko‘ra, soat Shtrausning jasadi va shaxsiy buyumlari bilan birga topilgan.
Keyinchalik ushbu soat uning avlodlariga topshirilgan. Ida Shtrausning jasadi esa topilmagan.
Bu voqea tarixda insoniy sadoqat va fojiali sevgi ramzi sifatida yodga olinadi.
