O‘zbekistonlik mashhur xonanda Shahzoda o‘zining shaxsiy kiyim brendini taqdim etdi. Bu haqda Zamin.uz xabar berdi.
“10787 by Shahzoda” nomli ushbu brend xonandaning uzoq yillik izlanishlari, ijodiy ilhomi va kuchli ehtirosi mahsuli sifatida yaratilgan. Shahzoda yangi loyihasi haqida gapirar ekan, bu brend uning ichki dunyosini aks ettirishini ta’kidladi.
San’atkorning so‘zlariga ko‘ra, jamoasi bilan birgalikda har bir libosni yaratishda yuqori sifatli matolar tanlangan va dizaynda soddalik hamda nafislik uyg‘unligiga alohida e’tibor qaratilgan. Shahzoda mazkur brend ayollikni, noziklikni va uslubdagi mukammallikni ifodalashini qayd etdi.
“10787 by Shahzoda” brendi nafaqat kiyim-kechak, balki xonandaning ijodiy qarashlari va nafis didini ham o‘zida mujassam etgan. Bu loyiha ayollarning go‘zalligini va o‘ziga xos uslubini ta’kidlashga qaratilgan.
