Luiza Rasulova Farrux Soipov bilan filmda ishlashni xohlardi
Aktrisa Luiza Rasulovaga jurnalistlar tomonidan “Kinoda qaysi aktyor bilan birga rol ijro etishni xohlagan bo‘lardingiz?” degan savol bilan murojaat qilishdi. Bu haqda Zamin.uz xabar berdi.
Aktrisa bu savolga hazil ohangida javob berib, “Men sekingina Gollivudga ketib qolgan bo‘lardim,” deya kulib javob qaytardi. Shundan so‘ng, Luiza Rasulova o‘z fikrlarini jiddiy davom ettirib, mahalliy kino olamida ham iste’dodli aktyorlar juda ko‘p ekanini ta’kidladi.
U Adiz Rajabov va Ulug‘bek Qodirov bilan birga ishlash baxtiga allaqachon muyassar bo‘lganini aytib, bu ijodiy hamkorlik uning yodida yaxshi xotiralar qoldirganini e’tirof etdi. Aktrisaning so‘zlariga ko‘ra, agar imkon bo‘lganida, u san’atni tark etgan iste’dodli aktyor Farrux Soipov bilan bir filmda partnyor sifatida ishlashni xohlagan bo‘lardi.
“Afsuski, hozir buning imkoni yo‘q. Savol shunday bo‘lgani uchun javobim ham shunga mos bo‘ldi,” — deya izoh berdi u.
Bundan tashqari, Luiza Rasulova boshqa ko‘plab iqtidorli aktyorlar borligini ham alohida ta’kidladi. Uning fikricha, yosh jihatdan mos partnyor sifatida Farrux Soipov eng to‘g‘ri nomzod bo‘lgan bo‘lardi.
Aktrisa ota va qiz obrazlari haqida gapirar ekan, mamlakatimizda bu rollarni mahorat bilan ijro eta oladigan aktyorlar yetarli ekanini ham qayd etdi.
