Sevinch Ismoilovaga jamoasi yangi avtomobil sovg‘a qildi
O‘zbek estradasining taniqli xonandalaridan biri Sevinch Ismoilova yangi avtomobilga ega bo‘ldi. Bu haqda Zamin.uz xabar berdi.
Bu haqda u o‘zining ijtimoiy tarmoqlardagi sahifasida muxlislariga samimiy minnatdorchilik bilan ma’lum qildi. Xonandaning so‘zlariga ko‘ra, kun davomida konsert tayyorgarliklari va ish bilan band bo‘lgan.
Uyga qaytganida esa jamoasi unga kutilmagan sovg‘a taqdim etib, xursand qilgan. Sevinch Ismoilova bu holatdan hayajonlanib, o‘z his-tuyg‘ularini “Nima deyishniyam bilmiman, ichim to‘la sevinch”, deya ifoda etgan.
Xonanda o‘zining jamoasini “ishdagi oilam” deb atab, ularga cheksiz minnatdorchilik bildirdi. Shu bilan birga, u barcha insonlarni orzularidan voz kechmaslikka chaqirdi va “Orzular amalga oshadi”, deya ilhomlantiruvchi so‘zlarini ulashdi.
Sevinch Ismoilovaning ushbu samimiy postini muxlislari iliq kutib olishdi. Ko‘plab tabriklar va ezgu tilaklar uning ijodiga bo‘lgan e’tibor va jamoasining sadoqatli ekanligini yana bir bor namoyon qildi.
