“Suyaklar ibodatxonasi” filmi kassa yig‘imida mag‘lub bo‘ldi
“28 yil o‘tgach: Suyaklar ibodatxonasi” filmi AQSh kinoteatrlarida kutilgan darajadagi muvaffaqiyatga erisha olmadi. Bu haqda Zamin.uz xabar berdi.
Holywood Reporter xabariga ko‘ra, mazkur film dastlabki uch kun ichida atigi 13 million dollar daromad keltirdi. Taqqoslash uchun aytish mumkinki, o‘tgan yil iyun oyida namoyish etilgan ilk qism prokatni 30 million dollar bilan boshlagan edi.
Mutaxassislarning fikricha, yangi filmning past daromad ko‘rsatishiga ikki qism orasidagi vaqtning juda qisqa bo‘lgani sabab bo‘lgan. Ikkinchi qism birinchi qismdan atigi yarim yil o‘tib taqdim etilgan.
Shunga qaramay, filmda Reyf Faynsning ishtiroki va Killian Merfining kutilmagan chiqishi keyingi haftalarda tomoshabinlar oqimini barqarorlashtirishi mumkin. Sony kompaniyasi esa trilogiyani yakunlash rejasidan voz kechmaganini bildirmoqda.
Mazkur film Angliyaning Nortumberlend grafligi hamda Yorkshir-Deylz vodiysida suratga olingan. Film uchun suyaklardan yasalgan ulkan ibodatxona dekoratsiyasi maxsus qurilgan.
Ushbu dekoratsiya filmning asosiy sahnalarini yanada ta’sirli qilishga xizmat qilgan.
