Ayollarning fidoyiligi erkaklar yutug‘iga zamin bo‘ladi

Madaniyat va san’at vaziri Ozodbek Nazarbekov o‘zining so‘nggi intervyularidan birida jamiyat hayotida ayollarning o‘rni va ahamiyati haqida fikr bildirdi. Bu haqda Zamin.uz xabar berdi.

U ayollarning oilaviy hamda ijtimoiy masalalardagi mas’uliyatliligi va donoligi erkaklarning muvaffaqiyatiga bevosita ta’sir ko‘rsatishini ta’kidladi. Nazarbekovning so‘zlariga ko‘ra, erkaklarning katta yutuqlarga erishishi ko‘pincha ularning ortida turgan ayollarning qo‘llab-quvvatlashi va fidoyiligi bilan bog‘liq.

U shunday dedi: “Bugun biror erkak katta natijalarga erishayotgan bo‘lsa, bilingki, uning ortida mas’uliyatli va aql bilan ish yuritadigan ayol bor. Uydagi muammolarni o‘z zimmasiga olib, erkakning diqqat-e’tiborini chalg‘itmaslikka harakat qiladigan, oilaviy masalalarni oqilona hal qiladigan ayollarimiz bor.

Ular erkakning ishiga xalal bermaslik uchun qo‘llaridan kelganini qilishadi. Bu ayollarning fidokorona mehnati tufayli erkaklar hayotda va faoliyatda muvaffaqiyatga erishmoqda.” Shuningdek, Nazarbekov oiladagi va jamiyatdagi ayolning mas’uliyatliligi, aql-zakovati hamda harakatlari jamiyat rivojida muhim o‘rin tutishini alohida ta’kidladi.

Uning fikricha, ayollar oilaviy muhitni barqarorlashtirish va jamiyatni oldinga olib chiqishda hal qiluvchi kuchga ega.