Ozodbek Nazarbekov: Ayollar jamiyat va oilaning tayanchi
Madaniyat va san’at vaziri Ozodbek Nazarbekov o‘zining so‘nggi intervyularidan birida ayollarning jamiyat va oiladagi ahamiyati haqida fikr bildirdi. Bu haqda Zamin.uz xabar berdi.
Uning so‘zlariga ko‘ra, hayotda katta muvaffaqiyatlarga erishgan erkaklarning ortida mas’uliyatli va dono ayollar turgani ko‘p kuzatiladi. Ozodbek Nazarbekov shunday dedi: "Agar biror erkak katta natijalarga erishayotgan bo‘lsa, bilingki, uning ortida fidoyi va mas’uliyatli ayol bor.
Uydagi muammolarni o‘z zimmasiga olgan, qiyinchiliklarni hal qilishga intilayotgan ayollarimiz erkaklarning diqqatini asosiy maqsaddan chalg‘itmaslikka harakat qilishadi. Ko‘pincha ular 'Nimadir muammo bo‘lsa, menga ayt, otangga aytma', deb erkakni qo‘llab-quvvatlashadi.
Shu sababli biz hayotimizda va kasbiy faoliyatimizda yutuqlarga erishmoqdamiz." Nazarbekovning fikricha, ayollarning mas’uliyatliligi va aql-zakovati nafaqat oilaviy muhitni, balki jamiyatni rivojlantirishda ham muhim omil hisoblanadi. U ayollarning bunday roli oilaviy barqarorlik va jamiyat taraqqiyoti uchun asosiy kuch ekanini ta’kidladi.
