«Ay Yola» guruhi Toshkentda mehmon bo‘ladi
2025 yilda dunyo bo‘ylab ommalashgan «Xomay» qo‘shig‘i ijrochilari, Boshqirdistonning mashhur «Ay Yola» guruhi, O‘zbekistonga tashrif buyuradi. Bu haqda Zamin.uz xabar berdi.
Ushbu jamoa joriy yil 28 yanvar kuni Toshkent shahrida bo‘lib o‘tadigan «Yangi O‘zbekiston yulduzlari» milliy mukofoti taqdirlash marosimida mehmon sifatida ishtirok etadi. Mazkur tadbir nafaqat «Ay Yola» guruhining chiqishi bilan, balki milliy mukofotning tantanali kechasi bilan ham esda qoladi.
Tadbirda boshqa mashhur mehmonlar ham ishtirok etishi kutilmoqda. Jumladan, Tojikiston xalq artisti Nigina Amonqulova, Ozarbayjon xalq artisti Mensum Ibrahimov hamda O‘zbekiston va Ozarbayjon xalq artisti Gulyanaq Memedova ham taklif qilingan.
Eslatib o‘tamiz, mazkur mukofot marosimi bu yil to‘rtinchi bor tashkil qilinmoqda. Hozirgacha 20 ta nominatsiya bo‘yicha 60 nafar ijodkor mukofotlangan.
Hozirda esa navbatdagi nominatsiyalar bo‘yicha g‘oliblarni aniqlash jarayoni davom etmoqda. Ovoz berish Milliytanlov.uz platformasi orqali amalga oshirilmoqda.
Mukofot g‘oliblari maxsus statuetka, sertifikat va bazaviy hisoblash miqdorining 100 baravari miqdoridagi pul mukofoti bilan taqdirlanadi. Ushbu mukofot milliy san’at va madaniyat rivojiga qo‘shilgan hissani e’tirof etish maqsadida ta’sis etilgan.
28 yanvar kuni Toshkentda katta madaniy kecha bo‘lib o‘tadi. Sahnada mashhur mehmonlar, zalda esa faol muxlislar yig‘iladi.
Agar siz o‘z nomzodingizni qo‘llab-quvvatlamoqchi bo‘lsangiz, ovoz berishni unutmang. Har bir ovoz tanlovning adolatli va shaffof o‘tishida muhim ahamiyatga ega.
