Muhammadiso Abdulxairov: "O‘zimizni o‘zimiz ajratyapmiz, bu noto‘g‘ri"
Aktyor Muhammadiso Abdulxairov jamiyatda viloyatlarga qarab odamlarni ajratish va bunday yondashuvning zararli oqibatlari haqida keskin fikr bildirdi. Bu haqda Zamin.uz xabar berdi.
U yo‘llarda avtomobil raqamiga yoki odamning qayerdan ekaniga qarab munosabat o‘zgartirish odatini tanqid qilib, bu holatni jamiyatni bo‘linishga olib boruvchi omil sifatida baholadi. Aktyorning ta’kidlashicha, “qayerliksiz?” degan savol ko‘pincha beozor qiziqish emas, balki odamlarni ichki ajratishga xizmat qiladi.
Abdulxairov bu yondashuvni yomon ko‘rishini yashirmay, bunday savollar jamiyatda birlikka putur yetkazishini qayd etdi. U shuningdek, odamning qayerdan ekanligi tashqi ko‘rinishidan ham ayon bo‘lishi mumkinligini ta’kidladi va o‘zining o‘zbekistonlik ekanini iftixor bilan tilga oldi.
Abdulxairovning fikricha, agar suhbat davomida biror kishi uning tug‘ilgan joyini bilib, o‘zi ham o‘sha hududdanligini aytsa, munosabat iliqlashishi mumkin. Ammo boshqa viloyat nomi aytilganida, e’tibor yoki munosabat pasayishi ehtimoli bor.
Bu esa, aktyor fikricha, bilmasdan millatchilik kayfiyatini keltirib chiqaradi. Shuningdek, aktyor yo‘llarda avtomobil raqamlariga qarab odamlarni baholash odatini ham qoraladi.
“O‘zimizni o‘zimiz ajratyapmiz, bu noto‘g‘ri”, deydi u. Abdulxairov barcha viloyatlar farzandlari bir Vatan uchun xizmat qilayotganini eslatib, kundalik hayotda ham bir-birimizni ajratmaslikka chaqirdi.
U Farg‘onalik, Qashqadaryolik yoki boshqa viloyatdan bo‘lishidan qat’i nazar, barchamiz o‘zbekistonlik ekanimizni unutmasligimiz kerakligini ta’kidladi.
