Tom Holland va Zendaya yashirincha turmush qurdi
Gollivudning mashhur juftliklaridan biri Tom Holland va Zendaya rasman turmush qurgani haqida xabarlar tarqalmoqda. Bu haqda Zamin.uz xabar berdi.
Bu ma’lumot AQSH Kinoaktyorlar Gildiyasi mukofotini topshirish marosimi oldidan Zendayaning stilisti Lo Rouch tomonidan jurnalistlarga ma’lum qilingan. Stilistning aytishicha, juftlik yashirin to‘y marosimini o‘tkazib bo‘lgan va bu haqda hech kimga ma’lum qilmagan.
"To‘y allaqachon bo‘lib o‘tdi. Siz uni o‘tkazib yubordingiz", dedi Rouch.
Jurnalist bu xabar qanchalik to‘g‘ri ekanini so‘raganida, stilist kulib, "Bu mutlaqo haqiqat", deb javob berdi. Tom Holland va Zendaya birinchi bor 2016 yilda "O‘rgimchak odam: Uyga qaytish" filmi suratga olish jarayonida tanishgan edi.
Tom Piter Parker, Zendaya esa Meri Jey obrazini ijro etgan. Ular munosabatlarini 2021 yilda ochiq tarzda tasdiqlashgan.
Unashtirilganliklari haqidagi mish-mishlar esa Zendaya "Oltin Globus - 2025" marosimida nomsiz barmog‘ida yirik brilliant uzuk bilan ko‘ringandan keyin yanada kuchaygan. Tom Holland ham bir intervyusida Zendayani "bo‘lajak rafiqam" deb atab, bu mish-mishlarga oydinlik kiritgan edi.
