Anvar Sobirov akasining soyasida qolishni o‘zi uchun sharaf deb bildi
Xorazm vohasining iste’dodli vakili, taniqli aktyor va xonanda Anvar Sobirov yaqinda teleko‘rsatuvlardan birida mehmon bo‘lib, o‘zining ijodiy yo‘li hamda akasi, O‘zbekiston xalq artisti Og‘abek Sobirov bilan bog‘liq munosabatlari haqida ko‘nglidagi gaplarini ochiqladi. Bu haqda Zamin.uz xabar berdi.
San’atkor suhbat davomida akasining soyasida qolib ketish haqidagi gap-so‘zlarga munosabat bildirib, buni o‘zi uchun kamsitish emas, aksincha, ulkan sharaf va baxt deb bilishini alohida ta’kidlab o‘tdi. Anvar Sobirovning so‘zlariga ko‘ra, ular bolalik yillaridan buyon nafaqat qondosh aka-uka, balki eng yaqin sirdosh va hamfikr do‘st sifatida voyaga yetganlar.
Ular o‘rtasidagi rishtalar shunchalik mustahkamki, har qanday muhim qaror qabul qilinishidan avval albatta o‘zaro maslahatlashib, bir-birlarining fikrlarini inobatga oladilar. Xonanda o‘zining shaxsiy hayotida ham, ijodiy faoliyatida ham akasining o‘rni beqiyos ekanini, bunday samimiy munosabatlar uchun har doim shukronalik keltirishini aytib o‘tdi.
San’at olamiga ilk qadamlarini qo‘ygan kezlarida ko‘pchilik uni mustaqil ijodkor sifatida emas, balki Og‘abek Sobirovning ukasi sifatida qabul qilgani va turli qiyoslashlar bo‘lganini esladi. Biroq bu holat uni hech qachon ranjitmagan.
Anvar Sobirovning fikricha, begona insonlarning ortidan ergashgandan ko‘ra, o‘zining jigari, ustoz darajasidagi insonning ortida turish va uning soyasida bo‘lish faxrli tuyg‘udir. U hayotda erishgan yutuqlari va san’atdagi o‘rni uchun avvalo yaratganga, so‘ngra sababchi bo‘lgan akasiga minnatdorlik bildirdi.
Shuningdek, suhbat davomida aka-uka o‘rtasida gohida sun’iy ravishda raqobat uyg‘otishga urinishlar bo‘lishi haqida ham so‘z bordi. Ba’zi odamlar ularni bir-biriga qarshi qo‘yishga yoki munosabatlariga darz ketkazishga harakat qilsa-da, Anvar Sobirov bunga yo‘l qo‘ymasligini qat’iy aytdi.
U akasini o‘zining hayotdagi eng katta suyanchiqlari va tog‘dek tayanchi deb biladi. O‘ziga nisbatan aytilgan tanqidlarga chidashi mumkinligini, biroq akasining obro‘siga putur yetkazadigan har qanday gap-so‘zni qabul qilmasligini samimiy kulgi bilan ifoda etdi.
