Dunyo miqyosidagi mashhur yulduz Jennifer Lopes 2025-yilda bo‘lib o‘tadigan «Up All Night: Live in 2025» nomli katta konsert turini e’lon qildi. Bu haqida Upl.uz xabar berdi.
Ushbu tur ko‘plab mamlakatlarni qamrab oladi va birinchi marta O‘zbekiston ham bu ro‘yxatda bo‘ladi. Konsert turi 2025-yilda boshlanib, Amerika Qo‘shma Shtatlari, Yevropa va Osiyo davlatlarini, jumladan Qozog‘iston, Armaniston va O‘zbekistonni o‘z ichiga oladi.
Toshkentda Jennifer Lopes to‘liq formatdagi konsert dasturi bilan chiqish qiladi. Unda mashhur qo‘shiqlar, ajoyib raqslar va maxsus effektlar taqdim etiladi.
Konsert 7-avgust kuni «Milliy» stadionida (Bunyodkor) bo‘lib o‘tadi. Bunday darajadagi yulduzning O‘zbekistonga tashrifi madaniy sohada muhim voqea hisoblanadi.
Ushbu tadbir madaniyat va san’atni rivojlantirish jamg‘armasi tomonidan tashkil etilgan bo‘lib, xalqaro madaniy hamkorlikni mustahkamlash va mamlakatning turizm sohasini rivojlantirishga xizmat qiladi. Tashkilotchilar Jennifer Lopesning Toshkentdagi chiqishi O‘zbekiston madaniy hayotida muhim voqea bo‘lib, respublikani jahondagi mashhur yulduzlar uchun yangi diqqat markaziga aylantirishini ta’kidlashmoqda.
Bu konsert nafaqat qo‘shiqchining muxlislariga unutilmas taassurotlar taqdim etadi, balki O‘zbekistonning boy madaniy merosi va turizm salohiyatini xalqaro maydonda yanada ommalashtirishga yordam beradi. Chiptalar «iticket.uz» platformasida yaqin kunlarda sotuvga chiqarilishi kutilmoqda.
Butun dunyoda san’atkorga bo‘lgan katta qiziqishni hisobga olsak, chiptalarga talab yuqori bo‘lishi ehtimoldan xoli emas.
