O‘zbekiston dunyoda o‘rik yetishtirishda ikkinchi o‘rinda
AQSHning World Population Review nashri dunyoda o‘rik yetishtiruvchi mamlakatlar xaritasini e’lon qildi. Bu haqida Zamin.uz xabar berdi.
Shuningdek, Italiyaning Cherrytimes.it nashri ham o‘rik yetishtirish borasida yetakchi o‘n davlat ro‘yxatini taqdim etdi. Mazkur manbalarga ko‘ra, O‘zbekiston doimiy ravishda yetakchi mamlakatlar qatorida turadi.
2024 yil yakunlariga ko‘ra, O‘zbekistonda jami 527 ming tonna o‘rik yetishtirilgan. Bu ko‘rsatkich mamlakatimizga dunyo bo‘yicha ikkinchi o‘rinni egallash imkonini berdi.
O‘rik yetishtirishdagi bunday yuksak natija O‘zbekistonning agrar sohasidagi salohiyati, iqlim sharoiti va meva-sabzavotchilik sohasidagi muvaffaqiyatlarining aniq ifodasidir. Ushbu yutuq mamlakatimizda qishloq xo‘jaligi rivojlanishining yorqin namunasi hisoblanadi va eksport salohiyatini oshirishga xizmat qiladi.
O‘zbekiston o‘rik yetishtirish bo‘yicha xalqaro maydonda o‘z o‘rnini mustahkamlashda davom etmoqda. Bu esa xalqimizning mehnatsevarligi va tabiiy sharoitlarning qulayligidan dalolat beradi.
Shu bois, o‘rik yetishtirish sohasidagi muvaffaqiyatlarimizni yanada oshirish maqsadida yangi texnologiyalarni joriy etish va agrar sohani yanada rivojlantirish muhim ahamiyat kasb etadi.
