Qurolli Kuchlar oliy bosh qo‘mondoni, Prezident Shavkat Mirziyoyev 29 iyul kuni harbiy ta’lim tizimini takomillashtirish bo‘yicha takliflar taqdimoti bilan tanishdi. Bu haqida Zamin.uz xabar berdi.
Taqdimotda Qurolli Kuchlar akademiyasini isloh qilish va uning negizida O‘zbekiston Respublikasi harbiy xavfsizlik va mudofaa universitetini tashkil etish rejalashtirilgani ma’lum qilindi. Ushbu universitet tarkibiga Mudofaa vazirligining barcha harbiy ta’lim muassasalari, jumladan, beshta institut, Serjantlar tayyorlash oliy maktabi hamda Aviatsiya va uchuvchisiz uchish apparatlari mutaxassislarini tayyorlash markazi institut maqomida qo‘shiladi.
Yangi tizim markazlashgan vertikal boshqaruvni ta’minlab, qo‘shinlarning jangovar salohiyatini oshirishga, dual ta’limni kengaytirishga hamda ilmiy tadqiqotlarni amaliyotga joriy etishga xizmat qiladi. Serjantlar tayyorlash oliy maktabida zamonaviy qurollar va yangi taktik usullar bo‘yicha ko‘nikmalarni oshirish, shuningdek, serjantlarning yetakchilik qobiliyatini shakllantirish uchun yangi ta’lim tizimi yo‘lga qo‘yiladi.
Shuningdek, tor ixtisosliklar bo‘yicha «2+2» tartibi joriy etiladi. Bu tartibga ko‘ra, psixolog, aloqachi, ta’minotchi va omborchi kabi 18 xil yondosh soha mutaxassislari boshqa oliy ta’lim muassasalarining ikkinchi bosqich talabalari orasidan tanlab olinadi.
Iqtidorli yoshlarni qo‘llab-quvvatlash maqsadida yangi o‘quv yilidan boshlab bitiruvchi bosqich kursantlari uchun tanlov asosida «Oliy Bosh Qo‘mondon» davlat stipendiyasi beriladi. Ushbu stipendiya egasi bakalavriatni tamomlagach, besh yil davomida oliy harbiy ta’lim muassasalarining magistraturasiga imtihonsiz qabul qilinadi.
Endilikda oliy harbiy ta’lim muassasalarining 36 ta ta’lim yo‘nalishi bitiruvchilari ikki diplomga ega bo‘ladi. Ular fuqarolik va harbiy kasbga mo‘ljallangan mutaxassislik sohiblari hisoblanadi.
Bu islohotlar doirasida harbiy pedagoglarni tanlash va saralash tartibi kuchaytiriladi, shuningdek, ularni yetakchi xorijiy davlatlarda o‘qitish tizimi joriy etiladi. Taqdimot yakunida mazkur takliflar ma’qullanib, ularni samarali amalga oshirish bo‘yicha ko‘rsatmalar berildi.
Manba: zamin.uz
