Kembrij lug‘atiga 6000 dan ortiq yangi so‘z qo‘shildi
Kembrij lug‘ati ingliz tilini o‘rganishda muhim manba hisoblanadi va doimiy ravishda yangi so‘zlar bilan boyitib boriladi. Bu haqida Zamin.uz xabar berdi.
Yaqinda lug‘atga taxminan 6000 yangi so‘z va iboralar qo‘shildi. Ushbu yangi so‘zlar orasida ijtimoiy tarmoqlarda, ommaviy axborot vositalarida va kundalik hayotda keng tarqalgan «skibidi», «delulu», «broligarchy» kabi so‘zlar ham mavjud.
Masalan, «skibidi» so‘zi turli vaziyatlarda turlicha ma’noga ega bo‘lib, u «zo‘r» yoki «yomon» degan ma’nolarda ishlatiladi. Bu so‘z rus animatori Aleksey Gerasimovning «Skibidi Toilet» animatsion serialidan olingan bo‘lib, unda harakatlanuvchi unitazlar va agentlar o‘rtasidagi kurash tasvirlanadi.
Shuningdek, «delulu» so‘zi ingliz tilidagi «delusional» so‘zining qisqartmasi bo‘lib, xayolparastlik yoki real bo‘lmagan narsalarga ishonishni ifodalaydi. «Tradwife» esa an’anaviy gender rollariga amal qiluvchi va shu asosda turmush qurgan ayolni anglatadi.
«Broligarchy» atamasi esa texnologik biznesdagi boy va ta’sirchan kichik guruhlarni tasvirlash uchun ishlatiladi, bu so‘z ayniqsa amerikalik ishlab chiqaruvchi va milliardlar egalariga nisbatan qo‘llanadi. Yana bir qiziqarli so‘z «Mouse jiggler» bo‘lib, bu kompyuter dasturi hisoblanadi.
U sichqoncha kursorini avtomatik harakatlantirib, kompyuter bloklanishini oldini oladi. Bu dastur masofadan ishlovchilar orasida mashhur, chunki u ish vaqtida «onlayn» holatini saqlashga yordam beradi.
Kembrij lug‘ati rahbari Kolin Makintoshning ta’kidlashicha, lug‘atga faqat dolzarb va til madaniyatini aks ettiruvchi so‘zlar kiritiladi. Internet madaniyati ingliz tilining shakllanishiga katta ta’sir ko‘rsatmoqda va bu jarayonni kuzatish hamda yangi so‘zlarni lug‘atga qo‘shish juda qiziqarli.
Shunday qilib, yangi so‘zlar nafaqat internet jargoni, balki ingliz tilining rivojlanishining muhim ko‘rsatkichidir. Ma’lumot uchun, 2024 yilda Kembrij lug‘ati 3200 dan ortiq yangi so‘zlarni qo‘shgan, o‘tgan yil davomida esa yana 6000 dan ortiq yangi iboralar va jargon so‘zlar lug‘atga kiritilgan (manba: zamin.uz).
