O‘zbekiston Prezidenti Shavkat Mirziyoyev kelasi oy Yevropaga safari rejalashtirilgan. Bu haqida Zamin.uz xabar berdi.
Rasmiy ma’lumotlarga ko‘ra, davlat rahbari 24 oktyabr kuni Belgiya poytaxti Bryusselda bo‘ladi. Bu haqda Yevropa kengashi Prezidenti Antoniu Koshta Shavkat Mirziyoyevga yo‘llagan tabriknomasida ma’lum qilgan.
Safar davomida Yevropa Ittifoqi va O‘zbekiston o‘rtasidagi munosabatlarda yangi bosqichni belgilovchi muhim hujjat — Kengaytirilgan sheriklik va hamkorlik to‘g‘risidagi bitim imzolanishi kutilmoqda. Antoniu Koshta o‘z maktubida 2025 yil 24 oktyabr kuni Bryusselda bo‘lib o‘tadigan uchrashuvni intiqlik bilan kutayotganini bildirib, bu uchrashuv Yevropa Ittifoqi va O‘zbekiston o‘rtasidagi hamkorlikni yanada rivojlantirish imkoniyatini yaratishini ta’kidlagan.
Shuningdek, u o‘tgan aprel oyida Samarqandda bo‘lib o‘tgan “Yevropa Ittifoqi – Markaziy Osiyo” birinchi sammiti haqida ham eslatib o‘tgan. Koshta o‘sha tashrif davomida o‘zbek xalqining samimiyligi va mehmondo‘stligini his qilganini, bu voqea unga yorqin xotiralar qoldirganini qayd etgan.
Shu sababli, Bryusseldagi oktyabr oyidagi uchrashuv nafaqat siyosiy muloqot, balki Yevropa va O‘zbekiston munosabatlarida yangi sahifa ochilishi kutilayotgan muhim voqea hisoblanadi. Manba: zamin.uz
