O‘zbekistonda uy-joy xaridiga keshbek joriy etiladi
O‘zbekistonda uy-joy xarid qiluvchilar uchun keshbek tizimini joriy etish masalasi hozirda muhokama qilinmoqda. Bu haqida Zamin.uz xabar berdi.
Bu haqda 29-avgust kuni Savdo-sanoat palatasi va qurilish sohasi vakillari ishtirokida o‘tkazilgan ochiq muloqotda ma’lumot berildi. Savdo-sanoat palatasi raisi Davron Vahobovning ta’kidlashicha, hozirda uy-joylarning atigi 10 foizga yaqini qo‘shilgan qiymat solig‘i bilan rasmiylashtirilmoqda, qolgan qismi esa soliqqa tortilmayapti.
Bu esa qurilish sohasidagi yashirin iqtisodiyotning ulushini oshirmoqda. Vahobov fikricha, jismoniy shaxslar uchun oldi-sotdi bitimi summasidan belgilangan tartibda keshbek berish orqali muammoni bartaraf etish mumkin.
Unga ko‘ra, jismoniy shaxslarga 4-5 foiz miqdorida keshbek joriy etish taklif qilinmoqda. Shu yo‘l bilan xaridorlar quruvchidan hisobvaraq-faktura talab qilib, oldi-sotdi summasining 5-6 foizigacha keshbek olish imkoniyatiga ega bo‘ladi.
Bu qadam uy-joy bozoridagi shaffoflikni oshirishga va soliqlarni rag‘batlantirishga yordam beradi. Hozirda mazkur taklif atroflicha o‘rganilmoqda va tizimning amaliy samaradorligi baholanmoqda.
Mutaxassislar keshbek tizimini joriy etish uy-joy bozorida qonuniylikni mustahkamlashda muhim rol o‘ynashini ta’kidlashmoqda (manba: zamin.uz).
