O‘zbekiston bo‘ylab issiq va quruq ob-havo saqlanadi

Ish haftasi davomida O‘zbekistonning ko‘plab hududlarida asosan quruq va osoyishta ob-havo saqlanishi kutilmoqda. Bu haqida Zamin.uz xabar berdi.

“O‘zgidromet” agentligining ilmiy prognozlariga ko‘ra, kechasi havo harorati 15-20 daraja atrofida bo‘ladi, kunduz kunlari esa 28-33 daraja issiq kuzatiladi. Shuningdek, mamlakatning janubiy hududlarida kunduzi harorat 35-38 darajagacha ko‘tarilishi ehtimoli mavjud.

8—10 sentyabr kunlari Toshkent va Farg‘ona viloyatlarining tog‘li hududlarida qisqa muddatli yomg‘ir yog‘ishi mumkin. Bundan tashqari, 12 sentyabr, juma kuni Qoraqalpog‘iston Respublikasi hamda Xorazm viloyatining ayrim joylarida qisqa va mahalliy yomg‘irlar kuzatilishi ehtimoli bor.

Shamol tezligi 7-12 metr sekundda bo‘lib, ba’zi hududlarda 13-18 metr sekundgacha kuchayishi, chang-to‘zon paydo bo‘lishi mumkin. Bu esa harakatlanishda ehtiyotkorlikni talab qiladi.

Toshkent shahrida 8 sentyabr kuni kunduzi havo biroz bulutli bo‘lib, qisqa muddatli yomg‘ir yog‘adi. Harorat kechasi 18-20, kunduzda esa 30-32 daraja atrofida bo‘ladi.

Ma’lumotlar “O‘zgidromet” agentligidan olindi.