Toshkentda yo‘l-transport hodisalari soni oshmoqda
Toshkent shahar hokimligi Ochiq ma’lumotlar portali orqali e’lon qilingan statistik ma’lumotlarga ko‘ra, 2018-yildan 2025-yilning avgust oyigacha Respublika bo‘yicha jami 32 028 ta yo‘l-transport hodisalari (YTH) ro‘yxatga olingan. Bu haqida Zamin.uz xabar berdi.
Ushbu ko‘rsatkichlar poytaxtdagi yo‘l harakati xavfsizligi va transport tizimining holatini aniq aks ettiradi. Mutaxassislarning ta’kidlashicha, 2018-2024-yillar davomida yillik o‘rtacha YTHlar soni 4 350 taga teng bo‘lgan.
Biroq 2025-yilda bu ko‘rsatkich 10,02 foizga o‘sdi. Ayniqsa, 2023-yil 1-apreldan kuchga kirgan yangi qoidalar — shaharlarda harakat tezligini 70 km/soatdan 60 km/soatga kamaytirish — bu o‘sishda muhim rol o‘ynadi.
Yillar kesimida qaralganda, 2021-yilda Toshkentda 3 452 ta YTH sodir bo‘lgan bo‘lsa, 2022-yilda bu raqam 5 094 taga, 2023-yilda 4 733 taga, 2024-yilda esa 5 008 taga yetgan. 2025-yilning yanvar-avgust oylarida esa YTHlar soni taxminan 4 350 taga yaqinlashgan.
Joriy yil aprel-iyul oylarida har oyda o‘rtacha 630-640 ta yo‘l-transport hodisasi qayd etilgan. Hodisalarning geografik taqsimotiga kelsak, 2018-2025-yillar davomida Toshkent shahrining tumanlari bo‘yicha YTHlar soni quyidagicha bo‘lgan: Yunusobod tumani — 4 232 ta, Chilonzor — 4 214 ta, Yashnobod — 3 219 ta, Mirzo Ulug‘bek — 3 136 ta, Shayxontohur — 2 917 ta, Olmazor — 2 806 ta, Uchtepa — 2 594 ta, Sergeli — 2 322 ta, Mirobod — 2 161 ta, Yakkasaroy — 1 719 ta, Bektemir — 1 596 ta va Yangihayot — 1 041 ta.
Ushbu ma’lumotlar Toshkent shahar hokimligi Ochiq ma’lumotlar portalidan olindi.
