O‘zbekiston MDHda ombor maydoni bo‘yicha uchinchi o‘rinda
NF Group ma’lumotlariga ko‘ra, O‘zbekiston yuqori sifatli ombor ko‘chmas mulki hajmi bo‘yicha Mustaqil Davlatlar Hamdo‘stligi davlatlari orasida uchinchi o‘rinni egalladi. Bu haqida Zamin.uz xabar berdi.
2025 yilning uchinchi choragida mamlakatda jami 555 ming kvadrat metr ombor maydoni mavjud bo‘lib, bu sohada sezilarli o‘sish kuzatilmoqda. Reytingda birinchi o‘rinni Qozog‘iston (1,78 million kvadrat metr), ikkinchi o‘rinni Belarus (1,72 million kvadrat metr) egallagan.
O‘zbekiston esa kuchli uchlikka kirib, ombor infratuzilmasini rivojlantirishda faol ishtirok etmoqda. Mamlakatdagi mavjud omborlarning 56 foizi B sinfiga mansub bo‘lib, ularning 53 foizi spekulyativ loyihalar shaklida qurilgan.
Shuningdek, 20 foizi kompaniyalarning o‘z ehtiyojlari uchun mo‘ljallangan bo‘lsa, 15 foizi logistika operatorlari ixtiyorida. 2024 yil 4-choragidan 2025 yil 3-choragigacha O‘zbekistonda jami 160 ming kvadrat metr yangi ombor maydonlari foydalanishga topshirildi.
Kelgusi yillarda, xususan, 2026 yil oxirigacha yana 370 ming kvadrat metr ombor qurilishi rejalashtirilgan. Bo‘sh ombor maydonlari darajasi mamlakatda juda past bo‘lib, atigi 1,7 foizni tashkil etadi.
Ijara narxlari esa A sinfidagi omborlar uchun o‘rtacha yillik 156 dollarga teng bo‘lib, bu taxminan 1,9 million so‘mga to‘g‘ri keladi. B sinfi omborlar uchun esa ijara narxi yiliga o‘rtacha 90 dollar, ya’ni taxminan 1,1 million so‘mni tashkil etadi.
Ushbu ma’lumotlar NF Group va Kursiv.uz saytlaridan olindi.
