“Ishonch” jamg‘armasi maktablarga 20 mln dollar ajratadi

Namangan shahrida o‘tkazilgan “Kambag‘allikdan farovonlik sari” xalqaro forumida “Ishonch” jamg‘armasi O‘zbekistondagi maktablar sifatini yaxshilash maqsadida 20 million dollar ajratishini ma’lum qildi. Bu haqda Zamin.uz xabar berdi.

Ushbu mablag‘lar maktablarda suv ta’minoti, sanitariya va gigiyena sharoitlarini yaxshilash, shuningdek, ekologik toza energiya manbalari va xavfsiz isitish tizimlarini o‘rnatishga yo‘naltiriladi. Loyihaning doirasida 45 ta qishloq maktabi ta’mirlanib, 31 ming 500 nafar o‘quvchi, ayniqsa o‘smir qizlar uchun qulay va xavfsiz ta’lim muhitini yaratish ko‘zda tutilgan.

Bundan tashqari, 2700 nafar o‘qituvchi va maktab xodimlari iqlim o‘zgarishiga chidamlilik hamda gigiyena bo‘yicha maxsus o‘quv kurslaridan o‘tadi. Ushbu loyiha “Eng yaxshi maktabim” portali orqali jamoatchilik tomonidan real vaqtda kuzatib boriladi.

Ma’lumot manbai: Latipov telegram kanali.