Iqtisodiy tadqiqotlar va islohotlar markazi tomonidan O‘zbekiston Respublikasi Prezidenti Shavkat Mirziyoyevning BMT Bosh assambleyasining 80-sessiyasidagi nutqi lingvistik tahlil qilindi. Bu haqda Zamin.uz xabar berdi.
Ushbu tahlil jarayonida davlat rahbarining nutqida qaysi mavzular va atamalarga ko‘proq e’tibor qaratilgani aniqlangan. Natijalarga ko‘ra, eng ko‘p ishlatilgan so‘z birikmasi «Markaziy Osiyo» bo‘lib, u nutqda olti marta takrorlangan.
Bundan tashqari, «doimiy rivojlanish» iborasi to‘rt marta eslatilgan. Tahlil asosida prezident nutqida mintaqaviy hamkorlik va barqaror taraqqiyotga katta e’tibor qaratilgani ko‘rsatildi.
Shuningdek, inson kapitaliga taalluqli muhim yo‘nalishlar ham muhokama qilingan. Jumladan, xotin-qizlarning jamiyatdagi o‘rni, sog‘liqni saqlash tizimini mustahkamlash va suv resurslaridan samarali foydalanish masalalari alohida ta’kidlangan.
Markaz mutaxassislarining ma’lumotlariga ko‘ra, nutqdagi so‘zlar mavzular bo‘yicha tahlil qilinganda asosiy e’tibor ikki yo‘nalishda jamlangan: Markaziy Osiyo doirasidagi hamkorlik (18 foiz) hamda transport va ekologik muammolar (18 foiz). Shunday qilib, Shavkat Mirziyoyevning BMTdagi nutqi nafaqat mintaqaviy siyosatga, balki global ahamiyatga ega ekologik barqarorlik, sog‘liqni saqlash va gender masalalariga ham chuqur e’tibor qaratilganini ko‘rsatadi.
Ushbu tahlil Iqtisodiy tadqiqotlar va islohotlar markazi tomonidan o‘tkazilgan (manba: iqtisodiy.uz).
