Toshkentda yigit Prezidentni haqorat qilgani uchun sudlandi
Toshkent viloyatida 18 yoshli yigit O‘zbekiston Prezidenti Shavkat Mirziyoyev haqida ijtimoiy tarmoqdagi Instagram sahifasida haqoratomuz fikrlar bildirgani uchun sud javobgarligiga tortildi. Bu haqda Zamin.uz xabar berdi.
Sud hujjatlariga ko‘ra, u o‘z akkauntida Prezidentning rasmiga izoh yozib, unda haqoratli va obro‘sizlantiruvchi so‘zlarni ishlatgan. Tergov jarayonida sud-siyosatshunoslik va lingvistik ekspertizalar o‘tkazildi.
Ekspertlar yozilgan izohda davlat rahbariga nisbatan haqorat va sha’nini kamsituvchi so‘zlar borligini tasdiqladi. Ularning fikricha, bunday izoh jamoatchilik ongida davlat institutining obro‘siga salbiy ta’sir ko‘rsatishi mumkin.
Sud jarayonida ayblanuvchi yigit o‘z qilmishini tan oldi va bu so‘zlarni hissiyot bilan, o‘ylamasdan yozganini bildirdi. U hech qanday siyosiy maqsad ko‘zlamaganini ham ta’kidladi hamda qilgan ishidan afsusda ekanini aytdi.
Sud uning harakatlarini O‘zbekiston Respublikasi Jinoyat kodeksining 158-moddasi 3-qismi — “Internet orqali Prezidentni haqoratlash yoki tuhmat qilish” deb baholadi va aybli deb topdi. Sud hukmiga ko‘ra, ayblanuvchiga ikki yil muddatga ozodlikni cheklash jazosi tayinlandi.
Shuningdek, unga bir qator cheklovlar ham qo‘yildi. Endilikda u alkogol ichimliklarni iste’mol qilmaydi, ko‘ngilochar joylarga, jumladan bar, kafe va restoranlarga bormaydi, ommaviy tadbirlarda qatnashmaydi hamda jinoyatga moyil shaxslar bilan muloqot qilmaydi.
Bundan tashqari, mahkum nazorat qiluvchi organning roziligisiz yashash joyini o‘zgartirishga yoki Toshkent viloyatidan tashqariga chiqishga haqli emas. Yuristlarning fikricha, mazkur holat mamlakatda internet madaniyati va onlayn mas’uliyat masalalarining ahamiyati yana bir bor oshganini ko‘rsatadi.
Mutaxassislar yoshlar orasida ijtimoiy tarmoqlarda so‘z erkinligi bilan shaxsiy haqoratni farqlash madaniyatini rivojlantirish zarurligini ta’kidlamoqda. Sudning bu qarori jamoatchilikda turli munosabatlarga sabab bo‘ldi.
Ba’zilar uni ogohlantiruvchi chora sifatida baholasa, boshqalar internetda fikr bildirish erkinligini cheklash deb hisoblamoqda. Hozirda sud hukmi qonuniy kuchga kirgan va yosh yigit belgilangan tartibda jazoni o‘tab bormoqda (manba: zamin.uz).
