O‘zbekiston pasporti dunyoda 82-o‘rinda turadi
Jahon pasportlari reytingi yangilandi. Bu haqda Zamin.uz xabar berdi.
Henley & Partners kompaniyasining so‘nggi tadqiqot natijalariga ko‘ra, O‘zbekiston pasporti dunyo bo‘yicha 82-o‘rinni egalladi. Bu degani, O‘zbekiston fuqarolari 61 ta davlatga vizasiz kirish imkoniyatiga ega.
Markaziy Osiyo davlatlari orasida eng yuqori o‘rin Qozog‘istonga nasib etdi. Qozog‘iston pasporti 67-o‘rinda turib, 78 ta mamlakatga vizasiz sayohat qilish imkonini beradi.
Qirg‘iziston 81-o‘rinda bo‘lib, uning fuqarolari 62 ta davlatga vizasiz kirishi mumkin. Tojikiston 87-o‘rinda, Turkmaniston esa 93-o‘rinda joylashgan.
Dunyo bo‘yicha esa Singapur eng kuchli pasportga ega bo‘lib, uning fuqarolari 193 ta davlatga vizasiz borishi mumkin. Janubiy Koreya va Yaponiya esa mos ravishda 190 va 189 ta davlatga vizasiz kirish huquqiga ega.
Amerika Qo‘shma Shtatlari ilk bor kuchli o‘ntalikdan chiqib, 12-o‘ringa tushdi va bu o‘rinni Malayziya bilan bo‘lishmoqda. Rossiya ham reytingda pasayib, 50-o‘ringa tushdi.
“Henley Passport Index” ekspertlari ta’kidlaganidek, oxirgi yillarda Osiyo davlatlari pasportlari dunyoda o‘z mavqeini mustahkamlab bormoqda. Bu holat iqtisodiy barqarorlik va xalqaro hamkorlikning kuchayishi bilan izohlanadi.
Manba: henleyglobal.com.
