O‘zbekiston va Saudiya investitsiyalar sohasida hamkorlikni kengaytirmoqda
Prezident Shavkat Mirziyoyev 15 oktyabr kuni Saudiya Arabistoni investitsiyalar vaziri Xolid al-Falix boshchiligidagi nufuzli delegatsiyani qabul qildi. Bu haqda Zamin.uz xabar berdi.
Uchrashuvda ikki mamlakat o‘rtasidagi iqtisodiy va investitsion hamkorlikni yanada rivojlantirish masalalari muhokama qilindi. Saudiya podshohi Salmon bin Abdulaziz va Valiahd Muhammad bin Salmonning salomlari va ezgu tilaklari Prezidentga yetkazildi.
So‘nggi yillarda O‘zbekiston va Saudiya Arabistoni munosabatlari jadal rivojlanmoqda. Savdo aylanmasi, investitsiyalar hajmi va qo‘shma korxonalar soni ortib bormoqda.
Ikki davlat o‘rtasida haftasiga 60 martagacha aviaqatnov amalga oshirilmoqda. Hozirgi kunda qo‘shma loyihalar portfeli 27 milliard dollarga yetgan.
Shu jumladan, 15 milliard dollari “ACWA Power” kompaniyasi bilan energetika sohasidagi yirik “yashil” energiya loyihalariga sarflanmoqda. Joriy yilda Saudiya sarmoyachilari O‘zbekistonda 2 milliard dollarlik investitsiya kiritdi.
Prezident Mirziyoyev yangi Toshkent xalqaro aeroporti qurilishi ikki mamlakat o‘rtasidagi uzoq muddatli sheriklikning muhim ramzi ekanini ta’kidladi. U energetika sohasida shamol va quyosh elektr stansiyalarini qurish, “yashil” vodorod ishlab chiqarish kabi loyihalarga alohida e’tibor qaratilishini bildirdi.
Shuningdek, “Data Volt” kompaniyasi ishtirokida Toshkentda zamonaviy ma’lumotlar markazi qurilayotgani ma’lum qilindi. Yangi Toshkent va Buxoroda shunday markazlar tashkil etish, raqamli iqtisodiyot va sun’iy intellekt sohasida hamkorlikni kengaytirish rejalashtirilgan.
Mineral xomashyo sohasida Saudiya investitsiyalarini jalb etish muhim yo‘nalish sifatida belgilandi. O‘zbekistonda volfram, litiy, magniy, titan va boshqa qimmatbaho konlar asosida “Kelajak metallari texnoparki” tashkil etilishi rejalashtirilmoqda.
Prezident saudiyalik ishbilarmonlarni geologiya-qidiruv va qayta ishlash loyihalarida faol ishtirok etishga chaqirdi. Infratuzilma sohasida ham bir qator loyihalar amalga oshirilmoqda.
Jumladan, “Miahona” kompaniyasi Farg‘ona va Jizzaxda oqova suvlarni tozalash, Qoraqalpog‘istonda suv ta’minoti tizimlarini yangilash ustida ishlamoqda. “Saudi Tabreed” kompaniyasi bilan kommunal xizmatlarni modernizatsiya qilish borasida kelishuvlarga erishildi.
Saudiyaning yetakchi korporatsiyalari — “ACWA Power”, “Vision Invest”, “Al Muhaidib Group”, “Riyadh Cables”, “InterHealth”, “AlMajdiah”, “Pemco” kabi kompaniyalar ushbu hamkorlikning yangi bosqichiga hissa qo‘shmoqda. Saudiya delegatsiyasi O‘zbekistondagi barqaror iqtisodiy siyosat, qulay investitsiya muhiti va ochiq bozor islohotlarini yuqori baholadi hamda kelgusida o‘zaro manfaatli sheriklikni yanada chuqurlashtirish niyatini bildirdi.
Manba: Prezident matbuot xizmati.
