Joriy yilning 17 oktyabr kuni Samarqand shahrida Mustaqil Davlatlar Hamdo‘stligiga a’zo davlatlar xavfsizlik organlari va razvedka xizmatlari rahbarlarining yig‘ilishi o‘z ishini boshlaydi. Bu haqda Zamin.uz xabar berdi.
Bu yig‘ilish mamlakatimizda ilk bor tashkil etilmoqda. Tadbirda Ozarboyjon, Armaniston, Belarus, Qozog‘iston, Qirg‘iziston, Rossiya, Tojikiston, Turkmaniston hamda O‘zbekiston xavfsizlik va razvedka xizmatlari rahbarlari ishtirok etadi.
Uchrashuvga O‘zbekiston Davlat xavfsizlik xizmati rahbari, general-polkovnik B.Qurbonov raislik qiladi. Tadbir doirasida ishtirokchilar zamonaviy xavf va tahdidlar yuzasidan fikr almashadi hamda MDH davlatlari razvedka xizmatlari o‘rtasidagi hamkorlikni yanada mustahkamlash bo‘yicha keyingi vazifalarni muhokama qiladilar.
Tadbir o‘tkaziladigan joy va kun tartibi 2024-yil 26 noyabr kuni Moskva shahrida bo‘lib o‘tgan 20-yubiley majlisda belgilangandi. Uchrashuv yakunida delegatsiyalar rahbarlari mintaqaviy xavfsizlikni ta’minlashga qaratilgan hamkorlikning aniq vazifalari va ustuvor yo‘nalishlarini belgilab oladi.
Manba: zamin.uz
