O‘zbekistonda banklarga nisbatan qattiq nazorat choralari
O‘zbekistonda bank tizimiga oid nazorat natijalari bo‘yicha bir qator moliyaviy tashkilotlarga nisbatan chora ko‘rildi. Bu haqda Zamin.uz xabar berdi.
Markaziy bank huzuridagi Bank nazorati qo‘mitasining sentyabr oyidagi yig‘ilishida jami 43 ta masala ko‘rib chiqilib, tegishli qarorlar qabul qilindi. Ushbu qarorlarning ko‘pchiligi banklarning ro‘yxatga olinishi, faoliyatini ruxsat berish va baholash bilan bog‘liq edi.
Tekshiruv natijalariga ko‘ra, ayrim banklar va to‘lov tashkilotlari prudensial talablar hamda qonunchilik normalariga to‘liq rioya etmaganligi aniqlangan. Natijada 7 ta bank va 13 ta to‘lov tashkilotiga rasmiy ogohlantirish berilib, ularga kamchiliklarni qisqa muddatda bartaraf etish topshirildi.
Shuningdek, 8 ta bank jinoiy daromadlarni legallashtirish hamda terrorizmni moliyalashtirishga qarshi kurashish qoidalarini buzganligi sababli jarimaga tortildi. Bu banklar mijozlarga xizmat ko‘rsatishda qonun talablariga ham rioya qilmagan.
Markaziy bankning ta’kidlashicha, bu chora-tadbirlar bank tizimidagi shaffoflikni oshirish va fuqarolarning moliyaviy ishonchini mustahkamlashga xizmat qiladi. Mutaxassislar fikricha, ushbu qarorlar moliya bozorida intizomni kuchaytirishga yordam beradi (manba: centralbank.uz).
