Toshkentda BRT tizimi orqali tirbandlik kamayadi
Prezident Shavkat Mirziyoyev Toshkent shahridagi yo‘l infratuzilmasini yangilash jarayonini ko‘zdan kechirar ekan, shahar markazida joriy etilgan BRT tizimi haqida fikr bildirdi. Bu haqda Zamin.uz xabar berdi.
U mazkur tizim orqali poytaxtda tirbandlikni kamaytirish, shuningdek, aholi uchun qulay, arzon va tezkor jamoat transportini yaratish mumkinligini ta’kidladi. Prezidentning so‘zlariga ko‘ra, agar shunday alohida yo‘laklar ko‘paytirilsa, ish kunlarida odamlar shaxsiy avtomobillaridan foydalanishni kamaytiradi.
Avtobuslar esa xavfsiz, tez va arzon bo‘lib, mashinalar faqat dam olish kunlari yoki oilaviy sayohatlar uchun ishlatiladi. Shota Rustaveli ko‘chasida tashkil etilgan yangi BRT tizimi boshqa ko‘chalarda amalga oshiriladigan loyihalar uchun namunadir.
Toshkent shahar hokimi Shavkat Umurzoqov Prezidentga yangi tizim haqida batafsil ma’lumot berdi. Yo‘lning ikki tomonida piyoda va velosipedchilar uchun alohida harakat yo‘laklari yaratilib, 14 mingdan ortiq daraxt ekilgan, drenaj tizimi esa to‘liq yangilangan.
Avtobuslar faqat yo‘lning o‘rtasidan harakatlanadi, bu esa jamoat transportining tezligini ikki barobar oshirishga imkon berdi. “O‘zbekiston 24” telekanalining tahlillariga ko‘ra, BRT tizimi dunyoning ko‘plab yirik shaharlarida muvaffaqiyatli qo‘llanilgan.
Bogota, Istanbul, Pekin va Mexiko kabi megapolislarda aynan shu tizim tufayli tirbandlik sezilarli darajada kamaygan. Toshkentda ilk BRT yo‘lagi Shota Rustaveli ko‘chasining Miroboddan Choshtepagacha bo‘lgan 7 kilometr qismida tashkil etildi.
Bu yo‘l 10 qatnov qismiga bo‘lingan bo‘lib, ulardan 6 tasi avtomobillar uchun, 2 tasi avtobuslar uchun va 2 tasi to‘xtash uchun mo‘ljallangan. Loyiha doirasida 21 ta yangi avtobus bekati, 463 ta “aqlli” svetofor va intellektual transport tizimi o‘rnatildi.
Yaqin yillarda yana 10 ta yo‘nalishda, jami 51 kilometr uzunlikda avtobus yo‘llari barpo etilishi rejalashtirilgan. Prezidentga taqdim etilgan rejaga ko‘ra, 2030-yilgacha BRT tizimi Shahrisabz, Amir Temur, Yangi Sergeli, Maxtumquli va Nurafshon ko‘chalarida ham joriy etiladi.
Bu maqsad uchun 126 million dollar mablag‘ ajratilishi ko‘zda tutilgan. Tizim to‘liq ishga tushgach, Toshkentda avtobuslarning tezligi soatiga 18 dan 23 kilometrgacha oshishi, qatnov intervali esa 20 daqiqadan 8–10 daqiqagacha qisqarishi kutilmoqda.
Shu tariqa, poytaxtda jamoat transportining zamonaviy va qulay shakli sifatida BRT tizimi orqali harakat madaniyati va hayot sifati yangi bosqichga ko‘tariladi (manba: zamin.uz).
