Prezident Shavkat Mirziyoyevga poytaxt va uning atrofidagi hududlarda yuk avtomobillari uchun maxsus avtovokzallar hamda to‘xtash maydonlari qurishga qaratilgan yangi loyiha taqdim etildi. Bu haqda Zamin.uz xabar berdi.
Ushbu loyiha doirasida yangi obyektlar yo‘l-patrul xizmatining “Erkin”, “Sharq”, “Bektemir”, “Uch qahramon” va “Turbanov” postlari yaqinida barpo etilishi rejalashtirilgan. Bu hududlarda haydovchilar uchun dam olish joylari, kempinglar va xizmat ko‘rsatish zonalari tashkil etiladi.
Ma’lumotlarga ko‘ra, ayrim obyektlar uchun 4,25 gektar, 7,7 gektar va 8 gektarlik yer maydonlari ajratilgan. Eng gavjum nuqta sifatida Sergeli tumanidagi “Erkin” posti ko‘rsatilmoqda, u orqali kuniga 40–50 mingga yaqin transport vositasi harakatlanadi.
Ichki ishlar vaziri Aziz Toshpo‘latov “O‘zbekiston 24” telekanalidagi “Menimcha” dasturida poytaxtda yuk avtomobillari harakati muayyan vaqtlarda cheklanishi haqida ma’lumot berdi. Uning so‘zlariga ko‘ra, Toshkentda tig‘iz soatlarda yuk mashinalarining harakati vaqtincha cheklanadi.
Ertalabki soatlarda bu cheklovlar joriy etiladi. Avtobuslardan tashqari, yuk mashinalari uchun ham dam olish joylari quriladi.
Masalan, Samarqanddan kelayotgan yuk mashinasi soat 8:00 da Toshkentga yetib kelsa, u maxsus to‘xtash maydonida bir necha soat kutib, keyin shaharga kirishi mumkin bo‘ladi. Bu tartib tirbandlikni kamaytirishga xizmat qiladi.
Bundan oldin Toshkent shahar hokimi Shavkat Umurzoqov poytaxtga har kuni 400 mingdan ortiq avtomobil kirib kelishini ta’kidlagan va bu holat harakat tizimida jiddiy muammolarni yuzaga keltirayotganini bildirgan. Shahar hokimining birinchi o‘rinbosari Baxtiyor Haydarov esa kirish-chiqish postlarini ko‘chirish va yangi yo‘l yechimlari orqali tirbandlikni kamaytirish rejalashtirilayotganini ma’lum qilgan.
Yangi loyihaga ko‘ra, shahar tashqarisida avtovokzallar, kempinglar hamda yengil va yuk mashinalari uchun alohida to‘xtash hududlari tashkil etiladi. Mablag‘ ajratish masalasi hal etilgan bo‘lib, loyihalash ishlari 2025-yilda boshlanadi, qurilish esa kelasi yil boshida yo‘lga qo‘yiladi.
Mutaxassislarning fikricha, ushbu tizim Toshkentdagi yo‘l tirbandligini sezilarli darajada kamaytiradi va transport oqimini tartibga solishda muhim ahamiyatga ega bo‘ladi (manba: zamin.uz).
