O‘zbekiston bo‘yicha ish haqi 19 foizga oshdi
Davlat statistika qo‘mitasining ma’lumotlariga ko‘ra, 2025 yilning yanvar-sentyabr oylarida O‘zbekiston bo‘yicha o‘rtacha nominal oylik ish haqi 6 million 166 ming so‘mni tashkil etdi. Bu haqda Zamin.uz xabar berdi.
Bu ko‘rsatkich o‘tgan yilning shu davriga nisbatan 19,2 foizga oshgan. Eng yuqori o‘sish Toshkent shahrida qayd etildi.
Poytaxtda o‘rtacha oylik maosh 10 million 379 ming so‘mga yetib, o‘tgan yilga nisbatan qariyb 19 foizga ko‘paygan. Hududlarda ham ish haqi o‘sishi sezilarli darajada bo‘ldi.
Samarqandda o‘rtacha ish haqi 4,8 million so‘m, Namanganda 4,5 million so‘m, Sirdaryoda 4,9 million so‘m, Farg‘onada esa 4,5 million so‘m atrofida shakllangan. Barcha viloyatlarda maosh oshishi 19 dan 25 foizgacha bo‘lgan.
Iqtisodiy faoliyat turlariga qarab tahlil qilinganda, eng katta o‘sish ko‘ngilochar va dam olish sohasida qayd etildi. Bu sohada o‘rtacha ish haqi 5 million so‘mga yetib, 22,8 foizga oshgan.
Ta’lim sohasida o‘sish 19,8 foizni, transport va logistika sohasida esa 16,7 foizni tashkil etdi. Axborot va aloqa sohasida eng yuqori oylik ish haqi qayd etildi, bu ko‘rsatkich 14,9 million so‘mga teng bo‘ldi.
Bank, sug‘urta va kredit sohalarida esa rekord darajada oylik maosh 16,8 million so‘mga yetdi. Ushbu ma’lumotlar Davlat statistika qo‘mitasi tomonidan taqdim etilgan (manba: statistika.uz).
