Mirziyoyev AQSH vakillarini qabul qilib, hamkorlikni muhokama qildi
Prezident Shavkat Mirziyoyev AQSH Prezidentining Janubiy va Markaziy Osiyo bo‘yicha maxsus vakili Serjio Gor boshchiligidagi delegatsiyani qabul qildi, deb xabar berdi Prezident matbuot xizmati. Bu haqda Zamin.uz xabar berdi.
Uchrashuvda AQSH Davlat kotibining o‘rinbosari Kristofer Landau va boshqa rasmiy shaxslar ham ishtirok etdi. Suhbat davomida ikki davlat o‘rtasidagi strategik sheriklikni mustahkamlash hamda 23 sentyabr kuni Nyu-Yorkda imzolangan oliy darajadagi kelishuvlarni amalga oshirish masalalari muhokama qilindi.
Serjio Gor uchrashuv boshida Donald Trampning Prezident Mirziyoyevga yo‘llagan samimiy salomlari va tilaklarini yetkazdi. Suhbat yakunida esa u Tramp nomidan bir qator sovg‘alar, jumladan shaxsiy kepkani topshirdi.
Tomonlar sanoat, energetika, raqamlashtirish, qishloq xo‘jaligi va moliya sohalaridagi hamkorlikni kengaytirish zarurligini ta’kidladi. Shuningdek, xavfsizlik, terrorizmga qarshi kurash, migratsiya va mintaqaviy barqarorlik masalalari ham ko‘rib chiqildi.
Kelgusi hafta Vashingtonda o‘tkaziladigan S5+1 sammiti tayyorgarligi ham muhokama mavzusiga kirdi. Ma’lumot uchun, Serjio Gor Toshkentda tug‘ilgan siyosatchi bo‘lib, Donald Trampning yaqin hamfikrlaridan biridir.
U avval Oq uyda kadrlar boshqarmasi direktori sifatida faoliyat yuritgan va 2025 yilda Tramp tomonidan Hindistondagi elchi lavozimiga nomzod etilgan. Hozirda esa AQSHning Janubiy va Markaziy Osiyo bo‘yicha maxsus vakili sifatida xizmat qilmoqda (manba: Prezident matbuot xizmati).
