O‘zbekiston va Rossiya: Mehnat va eksportda yangi kelishuvlar
O‘zbekistonning Yekaterinburg shahridagi Bosh konsulxonasi va Migratsiya agentligi vakolatxonasi tomonidan mahalliy yirik kompaniyalar bilan bir qator uchrashuvlar tashkil etildi. Bu haqda Zamin.uz xabar berdi.
Bu haqda "Dunyo" axborot agentligi xabar berdi. Muzokaralarning asosiy maqsadi o‘zbekistonlik mutaxassislarni qonuniy va xavfsiz ravishda ishga joylashtirish, shuningdek, ikki tomonlama iqtisodiy hamkorlikni rivojlantirishga qaratildi.
Dastlab Rossiyaning neft-gaz, energetika, sanoat va qurilish sohalarida faoliyat yurituvchi "Yevrakor" AJ vakili Olga Seves bilan muloqot o‘tkazildi. U kompaniya tomonidan ishchilarga bepul turar joy, oziq-ovqat, kafolatlangan maosh va zarur sharoitlar taqdim etilishini ta’kidladi.
Shuningdek, xodimlarni tanlash, patent rasmiylashtirish va ish joyiga yetkazish bo‘yicha aniq takliflar bildirildi. Ushbu kompaniyada o‘zbekistonlik mutaxassislarga talab yuqori ekanligi qayd etildi.
Shu bilan birga, Tyumen shahrida salat va rukkola qayta ishlashga ixtisoslashgan "Provans" MCHJ direktori Tatyana Ovsyankina bilan uchrashuv bo‘lib o‘tdi. U kompaniyaning O‘zbekistondan aysberg salati va rukkola import qilayotganini ma’lum qildi.
Ichki bozorda ushbu mahsulotlarga talab yuqoriligi sababli oyiga 200 tonna aysberg va 40 tonna rukkola xarid qilishni rejalashtirayotganini bildirdi. Shu munosabat bilan u o‘zbek fermerlari va eksportchilar bilan to‘g‘ridan to‘g‘ri hamkorlikni yo‘lga qo‘yishda yordam so‘radi.
Uchrashuvlarda o‘zbek tomoni mamlakatda zamonaviy mono-markazlar faoliyat ko‘rsatayotganini ta’kidladi. Ushbu markazlarda ishchilarni tanlash, o‘qitish va ish beruvchilar bilan to‘g‘ridan to‘g‘ri hamkorlik samarali tashkil etilgan.
Muzokaralar yakunida tomonlar bo‘sh ish o‘rinlari, mehnat va yashash sharoitlarini yaxshilash, hujjatlar rasmiylashtirishdagi muammolarni hal qilish hamda qishloq xo‘jaligi mahsulotlari eksportini kengaytirish bo‘yicha kelishuvlarga erishdi. Mazkur uchrashuvlar O‘zbekiston va Rossiya o‘rtasidagi mehnat bozoridagi hamkorlikning yangi bosqichga ko‘tarilayotganini ko‘rsatmoqda.
