O‘zbekistonda universal QR-kod tizimi joriy etiladi
O‘zbekistonda to‘lov tizimlarini yanada qulaylashtirish maqsadida yagona universal QR-kod joriy etilishi rejalashtirilmoqda. Bu haqda Zamin.uz xabar berdi.
Bu haqda O‘zbekiston Prezidentining “Moliyaviy texnologiyalar sohasini rivojlantirish chora-tadbirlari to‘g‘risida”gi qarorida belgilangan. Ushbu qaror asosida Markaziy bank 2025-yil dekabr oyida universal QR-kod bo‘yicha pilot loyihani amalga oshiradi.
Loyihada banklar va to‘lov tashkilotlari ishtirok etishi ko‘zda tutilgan. 2026-yil yanvar oyiga kelib, mazkur tizim bilan bog‘liq normativ-huquqiy hujjatlar ishlab chiqilib, tasdiqlanishi rejalashtirilgan.
Fevral oyidan boshlab esa universal QR-kod amaliyotga to‘liq joriy etiladi. Markaziy bank vakillarining ta’kidlashicha, hozirda ko‘plab savdo nuqtalarida bir nechta turli to‘lov xizmatlariga oid QR-kodlar mavjud bo‘lib, bu xaridorlar uchun noqulaylik tug‘diradi.
Yangi tizim esa bunday muammolarni bartaraf etadi. Yagona QR-kod orqali xaridorlar istalgan to‘lov ilovasi yoki xizmatidan foydalanib, to‘lovni amalga oshirishlari mumkin bo‘ladi.
Bu tizim tadbirkorlar uchun ham qulaylik yaratadi, chunki ular ortiqcha qog‘ozbozlik va bir nechta o‘rnatmalarni boshqarish zaruratidan xalos bo‘ladi. Prezident Shavkat Mirziyoyev ham tadbirkorlar bilan o‘tkazilgan ochiq muloqotda ushbu masalani muhokama qilib, universal QR-kod joriy etilishi tadbirkorlar va xaridorlar uchun katta qulaylik yaratishini ta’kidlagan.
Mazkur tizim to‘lov madaniyatini oshirish, hisob-kitoblarni tez va oson amalga oshirish imkoniyatini taqdim etishi kutilmoqda.
