Dekabrda iliq kunlar kutilyapti, yog‘ingarchilik ehtimoli bor.
O‘zgidromet markazining ma’lumotiga ko‘ra, dekabr oyida O‘zbekistonda qish fasliga xos ob-havo saqlanib turadi. Bu haqda Zamin.uz xabar berdi.
Oy boshida, ya’ni 1-3 dekabr kunlari havo biroz iliq bo‘lib, kunduzgi harorat 12-15 daraja atrofida bo‘lishi, kechalari esa 3 daraja sovuqdan 2 daraja iliqqacha o‘zgarishi kutilmoqda. 4-5 dekabr kunlari yomg‘ir yog‘ishi ehtimoli mavjud bo‘lib, harorat kunduz kunlari 3-6 darajagacha pasayadi.
6-7 dekabrda esa yana iliq ob-havo qaytib, kunduzgi harorat 12-15 darajagacha yetishi mumkin. Dekabr oyining ikkinchi va uchinchi o‘n kunliklarida havo harorati kechasi 2-7 daraja sovuqdan 0-5 daraja iliqqacha o‘zgaradi.
Kunduzgi harorat esa 2-7 daraja atrofida bo‘lib, ba’zi kunlarda 10-15 darajagacha ko‘tarilishi mumkin. Umuman olganda, dekabr oyida o‘rtacha harorat me’yordan 1-1,5 daraja yuqori bo‘lishi kutilmoqda.
Ayrim kunlarda yomg‘ir va qor yog‘ishi ehtimoli bor. Oyning oxiriga kelib, yangi yog‘ingarchiliklar bo‘lishi ham prognoz qilinmoqda.
Manba: O‘zgidromet.
