Ko‘p qavatli binolarda yonuvchan materiallar taqiqlanadi

O‘zbekiston hukumati binolarni tashqi devorlarida yonuvchan materiallardan foydalanishni taqiqlashni rejalashtirmoqda. Bu haqda Zamin.uz xabar berdi.

Bu haqda 1-dekabr kuni prezident Shavkat Mirziyoyev rahbarligida ekologik barqarorlik, qish mavsumiga tayyorgarlik va yong‘in xavfsizligi masalalariga bag‘ishlangan yig‘ilishda ma’lum qilindi. Davlat rahbari mamlakatdagi 44 mingdan ortiq ko‘p qavatli binolarda yong‘in xavfsizligi holatini to‘liq o‘rganish zarurligini ta’kidladi.

Shuningdek, u favqulodda vaziyatlar tizimining yong‘in xavf-xatarlariga tayyor bo‘lishi kerakligini qayd etdi. Prezident binolarning tashqi devorlarida kuchli yonuvchan materiallardan foydalanishni taqiqlovchi qat’iy talablarni qonunchilikka kiritish zarurligini alohida ta’kidladi.

Mazkur chora ko‘p qavatli binolarda qurilish normalarini va yong‘in xavfsizligi qoidalarini xalqaro tajribaga moslashtirishni ko‘zda tutadi. Shuningdek, mas’ul rahbarlarning javobgarligini oshirish va bu borada yangi qonun loyihasini ishlab chiqish vazifasi ham belgilandi.

Ushbu qadam binolarda xavfsizlikni ta’minlash va fuqarolar hayotini himoya qilishga xizmat qiladi. Ma’lumot manbasi: Zamin.uz.