O‘zbekistonda 2025 yilda toza havo himoyasi uchun 900 milliard so‘m mablag‘ ajratilishi rejalashtirilmoqda. Bu haqda Zamin.uz xabar berdi.
Bu haqda Oliy Majlis Qonunchilik palatasida deputatlar savollariga javob bergan Bosh vazir o‘rinbosari, iqtisodiyot va moliya vaziri Jamshid Qo‘chqorov ma’lum qildi. Uning so‘zlariga ko‘ra, ushbu mablag‘lar asosan zavodlardagi filtratsiya tizimlarini yangilash va ekologik holatni yaxshilashga yo‘naltiriladi.
Majlis davomida deputatlar 2026 yilgi davlat byudjetidan ekologik chora-tadbirlar uchun qo‘shimcha mablag‘ ajratilishi haqida ham so‘rashdi. Milliy ekologiya va iqlim o‘zgarishi qo‘mitasi rais o‘rinbosari Jusipbek Qozibekovning ma’lumotiga ko‘ra, 2026 yilda qo‘shimcha daromadlar hisobidan yana 548 milliard so‘m ajratilishi rejalashtirilgan.
Shuningdek, Toshkent shahrida ekologiyani yaxshilash bo‘yicha maxsus komissiya faoliyat olib bormoqda. Ular kunu tun ishlashmoqda, reydlar o‘tkazilmoqda va ba’zi korxonalar faoliyati vaqtincha to‘xtatilgan.
Mazkur chora-tadbirlar qisqa va uzoq muddatli rejalar asosida amalga oshirilmoqda. Ushbu sa’y-harakatlar ekologik muammolarni bartaraf etish va aholi uchun qulay yashash sharoitlarini yaratishga qaratilgan.
