Oʻzbekistonda havo harorati hududlarga qarab oʻzgaradi
Oʻzgidromet xizmati maʼlumotlariga koʻra, Toshkent shahrida ertalab va kechasi yomgʻir yogʻishi hamda tuman tushishi kutilmoqda. Bu haqda Zamin.uz xabar berdi.
Kunduzi havo harorati 3-5 daraja iliq boʻlib, tun vaqtida esa 0 darajagacha sovishi mumkin. Qoraqalpogʻiston Respublikasi, Xorazm, Buxoro va Navoiy viloyatlarida esa kuchli sharqiy shamol kuzatilishi ehtimoli bor.
Shamol tezligi sekundiga 22 metrgacha yetishi mumkin. Ushbu hududlarda tunda harorat -10 darajagacha pasayadi, kunduzi esa havo harorati 0 daraja atrofida boʻlishi kutilmoqda.
Qashqadaryo va Surxondaryo viloyatlarida esa havo nisbatan iliq boʻlib, harorat kunduzi 19 darajagacha koʻtarilishi mumkin. Respublikaning togʻoldi va togʻli hududlarida esa kuchli yogʻingarchilik kutilmoqda.
Bu hududlarda kechasi va kunduzi havo harorati 2-7 daraja atrofida boʻlishi taxmin qilinmoqda. Manba: Oʻzgidromet.
