Yo‘lovchi sog‘ligi sabab samolyot Bahraynga qo‘ndi
Jiddadan Toshkentga uchayotgan "Air Samarkand" aviakompaniyasiga tegishli yo‘lovchi samolyoti Bahrayn aeroportiga favqulodda qo‘nishga majbur bo‘ldi. Bu haqda Zamin.uz xabar berdi.
Bu qaror samolyot bortida bo‘lgan yoshi katta yo‘lovchilardan birining sog‘ligi keskin yomonlashgani sababli qabul qilingan. Parvoz davomida yo‘lovchining yuragi to‘xtab qolgan va vaziyat juda jiddiy tus olgan.
Ekipaj a’zolari tezkorlik bilan eng yaqin aeroportga qo‘nish haqida qaror qabul qilib, Bahrayn aeroportiga qo‘nishni amalga oshirishgan. Samolyot yerga qo‘ngach, darhol tibbiyot xodimlari chaqirilgan va yo‘lovchiga dastlabki tibbiy yordam ko‘rsatilgan.
Keyinchalik mahalliy shifokorlar reanimatsion choralarni amalga oshirishgan. Favqulodda holatdan so‘ng samolyotga zarur texnik tekshiruvlar o‘tkazilib, yonilg‘i bilan ta’minlangan.
Shundan so‘ng reys Toshkentga qarab yo‘lini davom ettirgan. Toshkentga yetib kelish rejalashtirilgan vaqtdan taxminan 2 soatga kechikkan.
Samolyot mahalliy vaqt bilan soat 9:49 da Toshkent aeroportiga muvaffaqiyatli qo‘ngan. Mazkur hodisa haqida "Zamin.uz" xabar berdi.
