O‘zbekiston Respublikasi Prezidenti Shavkat Mirziyoyev 18–20 dekabr kunlari Yaponiya Bosh vaziri Sanae Takaichining taklifiga binoan rasmiy tashrif bilan Tokioda bo‘ladi. Bu haqda Zamin.uz xabar berdi.
Ushbu tashrif davomida davlat rahbari Yaponiya Imperatori Naruxito, Bosh vazir, parlament va hukumat vakillari, shuningdek, siyosiy va ilmiy doiralarning yetakchilari bilan uchrashuvlar o‘tkazishi rejalashtirilgan. Tashrif chog‘ida O‘zbekiston va Yaponiya o‘rtasidagi strategik sheriklikni mustahkamlash asosiy masalalardan biri bo‘ladi.
Muzokaralarda savdo-iqtisodiy, investitsiyaviy hamda ilm-fan va ta’lim sohalaridagi hamkorlikni kengaytirish masalalari muhokama qilinadi. Shuningdek, yirik yapon kompaniyalari va moliya institutlari rahbarlari bilan uchrashuvlar o‘tkazilib, qo‘shma loyihalarni amalga oshirish bo‘yicha rejalar ko‘rib chiqiladi.
Tashrif yakunida ikki tomonlama hujjatlar imzolanishi kutilmoqda. Shavkat Mirziyoyev, shuningdek, “Markaziy Osiyo – Yaponiya” formatidagi davlat rahbarlarining birinchi sammitida ishtirok etadi.
Ushbu sammitda “yashil iqtisodiyot”, barqaror taraqqiyot, mintaqaviy hamkorlik va inson kapitalini rivojlantirish kabi masalalar muhokama qilinadi. Tadbir yakunida Tokio deklaratsiyasini qabul qilish rejalashtirilgan.
