O‘zbekistonda 20-oktyabr “Qutqaruvchilar kuni” bo‘ladi
O‘zbekiston Favqulodda vaziyatlar vazirligi mamlakatimizda Qutqaruvchilar kunini belgilashga oid qonun loyihasini ishlab chiqdi. Bu haqda Zamin.uz xabar berdi.
Ushbu loyiha sohaning yillar davomida rivojlanishi, o‘ziga xos tarixi va O‘zbekiston Prezidentining favqulodda vaziyatlar tizimini takomillashtirishga qaratilgan hujjatlarini tahlil qilib, 20-oktyabrni “O‘zbekiston Qutqaruvchilar kuni” sifatida belgilashni nazarda tutadi. Mazkur qonun loyihasining asosiy maqsadi qutqaruvchi kasbining jamiyatdagi o‘rni va ahamiyatini keng targ‘ib qilish, shuningdek, ushbu sohada faoliyat yuritayotgan malakali xodimlarni qo‘llab-quvvatlashdan iborat.
Agar loyiha qabul qilinsa, har yili 20-oktyabr kuni mamlakatimizda “Qutqaruvchilar kuni” rasman nishonlanadi. Bu bayram nafaqat iqtisodiyot obyektlaridagi qutqaruv tuzilmalari xodimlari, balki volontyor-qutqaruvchilar tomonidan ham keng miqyosda tantana qilinadi.
Ma’lumotlarga ko‘ra, Rossiya, Qozog‘iston, Qirg‘iziston, Belorus, Ukraina, Armaniston va Koreya Respublikasi kabi davlatlarda ham qutqaruvchilar kasbiga alohida e’tibor qaratilib, kasb bayrami sifatida “Qutqaruvchilar kuni” rasman nishonlanadi. Xalqaro miqyosda esa 1989 yilda BMT tomonidan oktyabr oyining ikkinchi chorshanbasi, 2017 yilda esa 13-oktyabr “Xalqaro tabiiy ofatlar xavfini kamaytirish kuni” sifatida belgilangan.
Agar mamlakatimizda ushbu qonun kuchga kirsa, qutqaruvchilar kasbiga bo‘lgan hurmat va e’tibor yanada oshadi. Bu esa ularning faoliyatini qadrlash, jamiyatda ularning o‘rni va hissasini kengroq targ‘ib qilish imkonini beradi.
