Shofirkonda bolani urib qochgan haydovchi topildi
Buxoro viloyati Ichki ishlar boshqarmasi Shofirkon tumanida yuz bergan yo‘l-transport hodisasi va undan keyingi tadbirlar yuzasidan rasmiy ma’lumot berdi. Bu haqda Zamin.uz xabar berdi.
Ijtimoiy tarmoqlarda “Damas” va “Labo” rusumli avtomashinalarning hujjatsiz ushlab turilgani haqida xabarlar tarqalgan edi. Boshqarma ushbu holat bo‘yicha tushuntirish berdi.
Ma’lum bo‘lishicha, 2026 yil 7 yanvar kuni soat 14:12 da Shofirkon tuman kasalxonasidan Ichki ishlar boshqarmasiga yo‘l-transport hodisasi haqida xabar kelib tushgan. Hodisa oqibatida 2011 yilda tug‘ilgan voyaga yetmagan fuqaro M.T.
turli tan jarohatlari bilan kasalxonaga yotqizilgan. Tekshiruv davomida aniqlanishicha, bola velosipedda harakatlanayotgan paytda orqadan kelgan oq rangli “Damas” avtomashinasi bilan to‘qnashgan.
Haydovchi voqea joyidan yashiringan va jabrlanuvchiga yordam ko‘rsatmagan. Jinoyatni fosh etish maqsadida, qonunchilikka muvofiq, tezkor-qidiruv tadbirlari o‘tkazilgan.
Jumladan, Shofirkon tumani hududida oq rangli “Damas” va “Labo” avtomashinalari tekshiruvdan o‘tkazilgan. Rasmiy ma’lumotga ko‘ra, ushbu avtomashinalar faqat vaqtincha to‘xtatilgan va qonunbuzilish aniqlanmagan transport vositalari egalariga qaytarilgan.
Haydovchilar bilan tushuntirish ishlari olib borilgan. 2026 yil 9 yanvar kuni soat 00:00 holatiga ko‘ra, ekspertiza natijasida hodisani sodir etgan gumonlanuvchi G‘ijduvon tumanida tug‘ilgan B.U.
ekani aniqlangan. Hodisa 2026 yil 7 yanvar kuni soat 11:50 atrofida sodir bo‘lgani va gumonlanuvchi o‘z aybiga iqror bo‘lgani bildirildi.
Unga tegishli oq rangli “Damas” avtomashinasi ham topilgan. Hozirda mazkur holat yuzasidan qonunchilik doirasida tegishli protsessual choralar ko‘rilmoqda.
Buxoro viloyati IIB ayrim xabarlarda keltirilgan “haydovchilar uzoq vaqt ushlab turilgan” degan ma’lumotlarni rad etdi. Ushbu mazmunda ichki ishlar organlariga hech qanday shikoyat kelib tushmagan.
Barcha tadbirlar qonuniy asosda va fuqarolar xavfsizligini ta’minlash maqsadida o‘tkazilgani ta’kidlangan. Manba: Zamin.uz.
