Nipah virusi: O‘zbekistonda xavf yo‘q, ehtiyot bo‘ling!

O‘zbekiston Sanitariya-epidemiologiya qo‘mitasi Hindistonning Kalkutta shahri yaqinida tarqalayotgan Nipah virusi bo‘yicha rasmiy ma’lumot berdi. Bu haqda Zamin.uz xabar berdi.

Ma’lum bo‘lishicha, Nipah virusi zoonoz turdagi yuqumli kasallik bo‘lib, u hayvonlardan insonga yuqishi mumkin. Virusning asosiy manbalari sifatida ko‘rshapalaklar ko‘rsatilmoqda.

Shuningdek, zararlangan oziq-ovqat mahsulotlari yoki insondan insonga yuqish ehtimoli ham mavjud. Mutaxassislarning ta’kidlashicha, Nipah virusi og‘ir kechadigan kasallik bo‘lib, u bosh miya yallig‘lanishi (ensefalit) yoki nafas yo‘llarida jiddiy asoratlarni keltirib chiqarishi mumkin.

Ayrim holatlarda kasallik juda og‘ir shaklda kechishi mumkinligi ham qayd etilmoqda. So‘nggi yillarda ushbu virus bilan bog‘liq epidemiyalar asosan Hindiston va Janubiy-Sharqiy Osiyo mamlakatlarida kuzatilgan.

Qo‘mita ma’lumotiga ko‘ra, hozirgi kunga qadar Nipah virusi O‘zbekiston hududida aniqlanmagan va epidemiologik vaziyat barqaror. Shunga qaramay, Hindistonga yoki virus tarqalgan hududlarga safar qilayotgan fuqarolarga ehtiyot choralariga rioya qilish tavsiya etiladi.

Jumladan, shaxsiy gigiyena qoidalariga amal qilish, qo‘llarni muntazam yuvish, antiseptik vositalardan foydalanish, meva-sabzavotlarni iste’mol qilishdan oldin yaxshilab yuvish, shuningdek, tekshirilmagan suvni ichmaslik zarur. Ayniqsa, ko‘rshapalaklar tirnagan yoki tishlagan, shikastlangan mevalarni iste’mol qilmaslik tavsiya etiladi.

Agar yuqori harorat, bosh og‘rig‘i yoki umumiy holsizlik kabi alomatlar kuzatilsa, darhol shifokorga murojaat qilish lozim. Sanitariya-epidemiologiya qo‘mitasi aholiga ushbu masalada hushyor bo‘lishni eslatib o‘tdi (manba: zamin.uz).