Zominda arzon narxli oziq-ovqat yarmarkasi tashkil etildi
Muborak Ramazon oyi arafasida Zomin tumanida ijtimoiy ahamiyatga ega oziq-ovqat mahsulotlari va kundalik ehtiyoj tovarlari narxlarini barqaror saqlash maqsadida savdo yarmarkasi tashkil etildi. Bu haqda Zamin.uz xabar berdi.
Shu bilan birga, savdo nuqtalarida nazorat va monitoring kuchaytirildi. Ushbu tadbirning asosiy maqsadi aholiga arzon, sifatli va yetarli mahsulotlar taqdim etish, narxlarning sun’iy oshirilishiga yo‘l qo‘ymaslik va bozorlarda sog‘lom raqobat muhitini shakllantirishdan iborat.
Shu munosabat bilan Zomin tumani hokimligi tomonidan bozorlar va savdo shoxobchalarida tizimli o‘rganish va nazorat tadbirlari olib borilmoqda. Mas’ul shaxslar mahsulotlar narxi, mavjud zaxiralar hajmi, savdo qoidalariga rioya etilishi, shuningdek, sanitariya-gigiyena talablariga amal qilinishini doimiy ravishda tahlil qilmoqda.
Savdo yarmarkasi doirasida aholiga asosiy turdagi oziq-ovqat mahsulotlari bozor narxiga nisbatan maqbul va hamyonbop baholarda taklif etilmoqda. Qayd etilishicha, ushbu chora-tadbirlar Ramazon oyi davomida narx-navolar barqarorligini ta’minlash, aholining ijtimoiy himoyasini kuchaytirish va ichki bozorda muvozanatni saqlashga xizmat qiladi.
Manba: one.uz.
