O‘zbekistonda naqd pul ishlatishga qat’iy cheklovlar joriy etiladi
Rasmiy manbalarning xabar berishicha, 2026 yil 1 apreldan boshlab O‘zbekistonda naqd pul ishlatishga qat’iy cheklovlar joriy etiladi. Bu haqda Zamin.uz xabar berdi.
Endilikda yoqilg‘i quyish shoxobchalarida benzin, dizel, propan, metan hamda elektr transport vositalarini zaryadlash, shuningdek, elektr energiyasi, gaz va suv uchun to‘lovlarni naqd pul orqali amalga oshirish taqiqlanadi. Barcha to‘lovlar faqat karta yoki elektron to‘lov vositalari yordamida qabul qilinadi.
Shu bilan birga, 25 million so‘mdan ortiq bo‘lgan xaridlar faqat bank o‘tkazmalari orqali amalga oshirilishi shart. Avtomobillar, uy-joylar va boshqa qimmatbaho tovarlarni xarid qilishda ham faqat karta yoki elektron to‘lov usullaridan foydalanish majburiy hisoblanadi.
Ushbu yangi tartib nafaqat aholiga, balki tadbirkorlarga ham qulayliklar yaratadi. Bu orqali iqtisodiy jarayonlarning shaffofligi oshadi va moliyaviy xavfsizlik ta’minlanadi.
Shu sababli, barcha fuqarolar va tadbirkorlar ushbu o‘zgarishlarga tayyor bo‘lishlari zarur. Elektron to‘lov vositalaridan foydalanish mamlakatimizda zamonaviy moliyaviy tizimni rivojlantirishga xizmat qiladi.
